Bilsiprako Solar Mission-na gong kr 100-ko chamgen: CM
SHILLONG: Sukrobar salo, a·dokni Chief Minister Conrad K Sangma, CM Solar Mission-ko Shillong-ni State Convention Centre-o a·bachengate on·angaha aro ia Solar Mission-ko a·bachengatanio a·dokni Power Minister Abu Taher Mondal, MNREDA-ni Chairman Rupert Momin aro dingtang dingtang official-rangba dongpae bak ra·angaha.
Ia CM Solar Mission-ko a·bachengate on·ani somoio a·dokni Chief Minister, tom·anio bak ra·giparangna aganprakangengon, ia Solar Mission-ara a·doko bijoli chu·onggijaniko namatna gita ra·baenggipa mission ong·ani gimin sorkari, bilsiprakon ia Solar Mission-na gong kror 100-ko chamgen ine parakataha.
Ia Solar Mission-ni kamo koros ong·aniko dingtangatna gita ia cholko ra·baenga ine janapatengon, ong·telaigipa bilrangko bikotanichi Meghalaya sorkari, kraa gita subsidy-rangko on·gen ine Chief Minister parakataha.
Chief Minister-ni parakatani gitade, dal·dalgipa unit-rangna 70 percent subsidy aro chonchongipa unit-rangna 50 percent subsidy-ko on·gen aro tangka paisani gita neng·nikanirangko komiatna gita ia mission, bank-rang baksa connect ka·na cholko on·e, unit-ni korosniko 40 percent-ona kingking man·pilna dakchakgen.
“CM Solar Mission-ko a·bachengataniara a·doko bijolina neng·nikaniko warachakanio sorkarini re·mikkanganiko mesokani ong·enga. Bijolina neng·nikaniko chu·gimik namatsrangna man·jagenchimoba ia Solar Mission-ko a·bachengatanichi 30%-oni 40%-ni gitade nokdangrang ia solar unit-rangko chatanichi dakchakaniko man·na sorkari ka·dongenga,” ine ua aganaha.
Ia Solar Mission-ko a·bachengatanichi lekka porani a·bao aro dal·dalgipa institute-rang bang·en namgnirangko man·gen ineba Chief Minister parakataha.
“Ia CM Solar Mission-ara bijoli chu·onggijaniko namatna ja·ku de·anisan ong·aija indiba Meghalaya a·doko ong·telaigipa samtangtangko ripingna ja·ku de·chakataniba ong·enga,” ine Sangma aganaha.
Ia Solar Mission-ko a·bachengatanio a·dokni Power Minister AT Mondal-ba dongpae jinmana aganprakengon, a·dokni manderangna namgni ong·nagipa ja·kuko de·chakatahani gimin Chief Minister-ko mittepilangaha. Meghalaya a·doko bijoli bikotna gita hydro power-osa pangchakbatani a·sel chagrongna nangenggipa neng·nikanirangkoba ua talate on·angaha.
Ia tom·anio dongpae jinmana aganprakanggipa gipin manderangara, MNREDA-ni Chairman Rupert Momin, Power Department-ni Secretary Joram Beda aro gipinrang ong·a.
