TURA: South West Garo Hills a·jao songdongenggipa chadamberangni namgnina District Selection Committee (DSC)-ni gita kamna ra·anio joltangni candidate-rangna cholko on·chengchina gita didie, Garo Students Union (GSU) Western Zone (South) Ampati, South West Garo Hills a·jani Deputy Commissioner-na sedoataha.
Iani bidingo, South West Garo Hills a·jani Deputy Commissioner-na sedoatengon, “DSC-ni gita dingtang dingtang kamrangna manderangko seokanio chinga skanggipa a·jatangni candidate-rangna cholko on·chengchina gita mol·molenga aro kamna joltangni candidate-rango kragipa candidate-rang dongjagenchimode man·na nangani kri kamrangko on·china chinga u·iatskaenga,” ine GSU WZS Ampati-ni dilgiparang parakataha.
South West Garo Hills a·jao songdongenggipa manderangnaba kamrangko on·na gita district administration apsan cholrangkon on·na jotton ka·enga ine mittelpilaniko parakatengon, kamna ra·anio joltangni candidate-rangko ra·chenggenchimode ian South West Garo Hills a·jana nambatgipa ong·gen ine GSU WZS-ni dilgiparang parakataha.
“South West Garo Hills a·jao songdongenggipa manderangoba nangani kri changgipa sapgipa aro poraiani gadangrang donggiparang ong·a aro DSC-ni job recruitment-o joltangni manderangna cholrangko on·chenggenchimode ian joltangni chadamberangko didiani gitasan ong·aigija a·jao namroro silroroaniko ra·bana cholko on·ani gita ong·gen,” ine GSU WZS-ni dilgiparang parakataha.
