SHILLONG: Batanggimin bilsi 5-o, bang·a dingtang dingtang tom·anirangko ong·atangaha jensalo Meghala sorkarini delegate-rang New Delhi-oni maming ka·dongani gri re·bapilaha, jeon ILP-na dabianggipako name dake niangenga aro da·o UDP iani bidingo a·dokni Chief Minister baksa maidake ma·mong sorkarini aganchakatanirangko aro jarikangna ja·ku ga·anggen.
Batanggimin bilsi 5-o adita delegate manderang Prime Minister aro Union Home Minister Amit Shah-ko ILP-o ma·mongni chadengani bidingo sing·sandianiko dakna grongaha indiba gronga chanantian ILP-ko name dake niangpilchina maming ka·dongani gri baksa a·dokni delegate-rangko watatpilaha, ineba janapataha.
Iani bidingo Chief Minister baksa agangrikgen aro changsatai jarike nina baditana re·angna man·a aro changsatai iana aganchakataigenma, ine UDP-ni president Metbah Lyngdoh sing·anina aganchakangaha.
Chief Minister Conrad Sangma batanggimin bilsi 5-o iani bidingo baitaba chang Prime Minister aro Union Home Minister Amit Shah-ko grongaha indiba iani bidingo ma·mong rongtale parakaniko dakatja, ineba janapataha.
Iani bidingo party gimikon mol·mole niaha jeon VPP-koba man·chapataha aro uamangni aganchakatanirangko sengenga, ine a·dokni party-rangko ku·cholsan ong·atani bidingo press conference-ni somoio party-ni dilgipa aganangaha.
Party Lok Sabha poll-na agangrika dongkuja ine rongtalen parakatanganio, MetbaH Lyngdoh aganaha, general council namen tom·tome matchotaha aro uamang dingtang dingtang a·jarangoniko report-rangko man·soaha aro a·dok gadango party-ni kam ka·anirangni bidingo report-koba man·soaha.
“Anga bebe ra·a party-o, dakna nanggni kamrango chingna ka·dongchaka, party-ko mikkangchina an·ching ra·angna nanganio an·ching jotton ka·ani donga nanga,” ine ua aganaha. Party-ni daka kamrang baksa ua kusi ong·a aro da·o uamang party-oniko nambatgipa performance-rangko ong·katatna nichaksoenga, ine ua agandapangaha.
MDC election-na maidake ja·ku ga·angna nanga iani bidingo ta·raken party-ni mongsonggipa Committee chanchianggen.
