TURA: Tura-ni Chief Minister’s Office (CMO) ba Mini Secretariat-ko chadrape so·sojengjeng ong·atani bidingo, ACHIK aro GSMC-ko dilenggipa mande sakgittamni anticipatory bail-na bi·aniko Meghalaya High Court jegalataha.
Tura-ko Winter Capital songchina aro Reservation Roster-ko backlog policy gnang ra·gatchina dabienggipani bidingo a·dokni Chief Minister Conrad Sangma, ACHIK, GSMC aro dingtang dingtang dolni dilgiparangko July-ni 24 tariko Tura-ni CMO-o gronge agangrikengmiting somoio rang·san manderangni ro·ongrangko goe chadrapanichi so·sojengjeng ong·ahani gimin ACHIK-ni dilgipa Laben Ch Marak, ACHIK-ni general secretary Bernita R Marak aro GSMC-ni Co-Chairman Balkarin Ch Marak-ni kosako West Garo Hills a·jani Circle Inspector (Sadar) Bitching N Marak FIR ka·ahachim aro uandaken ia sakgittam manderang, police-rangni rim·aoni jokna gita Meghalaya High Court-o anticipatory bail-na dorgasto galahachim.
Ia dilgiparangni kosako police-rang, Unlawful Activities (Prevention) Act, Meghalaya (Maintenance of Public Order) Act aro Prevention to Damage to Public Property Act-ni dingtang dingtang niamrango pangchake mokordoma ka·ahachim.
Indake ong·engon, Tura-o so·sojengjeng ong·anio ia manderang jak donga ine sakkirang dongahani gimin ia manderangni kosako police-rangni sandirokengmiting somoio High Court, jak on·na man·kujawa ine August-ni 11 tariko Meghalaya High Court-ni Justice W Diengdoh parakatenba, ia mande sakgittamni anticipatory bail-na bi·aniko jegalataha.
Tura-ni CMO-o rang·san manderangni ro·ongrangko goe aro wa·alrangko so·e chadrapani a·sel komibeoba sak 18 sipairang saknaanirangko man·na nangahachim aro komibeoba bol 20 garirang nosto ka·ako man·na nangahachim.
Ia so·sojengjeng ong·atanio jak donganina police-rang da·o dipet sak 50 manderangko rim·na man·ahachim.
Tura-ko Winter Capital songchina aro reservation roster-ko backlog policy gnang ra·gatchina dabie ACHIK-ni dilgipa Laben Ch Marak, ACHIK-ni general secretary Bernita Marak aro GSMC-ni co-chairman Balkarin Marak, okumu chake jingjengataniko dakdilahachim ineba nikna man·a.
ACHIK, GSMC dilgiparangni anticipatory bail-na bi·aniko HC jegala
Date:
Share post:
