SHILLONG: Mairang constituency-ni MLA Metbah Lyngdoh-ko Sonibar salo, United Democratic Party (UDP)-ni president-na seokpiltaiaha.
Brigipa changna Mairang constituency-ni MLA ong·enggipa Metbah Lyngdoh-ko 2019 bilsini September 11 tariko, Assembly-ni gitcham Speaker aro UDP-ni gitcham president Dr Donkupar Roy-ni siangani ja·man UDP-ni president-na seokchenga-hachim.
Apsan daken, Nongthymmai-ni gitcham MLA Jemino Mawthoh-koba UDP-ni general secretary-na seokpiltaiaha.
Kobor on·timgiparangni parakatani gitade, UDP-ni gitcham president Donkupar Roy sagi siangani ja·man, UDP-ko bilakbatatna gita rakbee kamrangko ka·ahani gimin UDP-ni bang·bata membor-rangan, Lyngdoh-ni kamo kusi ong·e, ukon da·oba president-ni kamna seok-taiaha.
2018 bilsini Assembly election-o sakdok MLA-rangoni da·o ia 2023 bilsini Assembly election-o sak 12 MLA-rangko ong·katat-ahani giminba UDP-ni membor-rang, Lyngdoh-ko mitteltokaha.
Indake ong·engon, UDP-ni gital executive committee-o sakchet working president-rangkoba seokaha aro uamangara, Paul Lyngdoh, Titosstarwell Chyne, Nujorki Sungoh, Lahkmen Rymbui, Donbok Khymdeit, Rikman Sangma, LC Momin aro Renikton Lyngdoh Tongkhar ong·a.
Vice president-ni kamna seokako man·gipa sakbri membor-rangara, Allantry F Dkhar, Process Sawkmie, Shitlang Pale aro Mayralborn Syiem ong·skaa.
Ia gital executive committee-o saksku secretary-rangkoba seokaha aro uamangara, Lasky Rymbai, Jambor War, Balajied Ranee, Mitchell Wankhar, Winning Sungoh, GG Bung Snaitang, Dr Aman War, Teinwell Dkhar aro Monarch Shabong ong·a.
