TURA: Re·anggipa July jao, Tura-ni Mini Secretariat-o manderangni jinma chadrape so·sojengjeng ong·atanina rim·ako man·gipa Trinamool Congress (TMC)-ni dilgipa Richard M Marak-na jamin on·aha.
Ia so·sojengjeng ong·anio manderangko ding·chaoatna gita diditimaha aro chu, tangkarangkoba sualaha ine matnangenba, Richard-ko police-rang, uni nokoniko rim·eahachim.
Rim·ako man·ani ja·man ua be·enni gita an·senggijaniko man·ahani gimin police-rang uko sanna gita hospital-ona ra·angahachim.
Richard-ko police-rangni rim·ani ja·man, uni jikgipaba una chakpaaniko on·e, ia a·sel ong·anio uni segipa maming dakeba jak dongja ine parakatahachim.
Richard-ko rim·ani somoio ua hospital-osa sae dongengachim aro uni segipaba ua somoio unbaksan apsan donga ineba uni jikgipa a·kangahachim.
Ia a·sel ong·anina police-rang, da·o dipet sak 50 manderangko rim·ahachim aro rim·ako man·gipa manderangoni bang·batan TMC aro BJP-ni membor-rang ong·a ine police-rang matnangahachim.
