AMPATI: South West Garo Hills a·jao District Health Society, National Tuberculosis Elimination Program (NTEP) baksa nangrime, Nutritional Support Program-ko Sombar salo, Mahendraganj Community Health Centre (CHC)-o ong·atangenba, Tuberculosis (TB) sagiparangna, be·enna namgipa cha·anirangko suale on·angaha.
Ia program-ko ong·atanio Mahendraganj-ni MLA Sanjay A Sangma, mongsonggipa sokgipa ong·e bakko ra·angaha aro jolo TB saenggiparangna cha·anirangkoba uan on·gilangaha.
Ia program-ko ong·atanio MLA-ni jakchi, Mahendraganj CHC-o Ultrasound Machine, CCTV, amplifier aro uandakgipa bosturangkoba kulie on·angjolaha.
Ia tom·anio Mahendraganj-ni MLA, jinmana aganprakangengon, TB sabisiko bon·atna gita rakbee kamrangko ka·engani gimin an·seng baljokani a·bao kam ka·enggipa manderangko mittelpilangenba, ia jolo ambulance-ko on·china dabienganiko ua Christmas-na skangan chu·sokate on·gen ine ku·rachakaniko on·angaha.
Hospital-ni nanganirangko chu·sokate on·na gitaba ia tom·anio Sangma ku·rachakangaha.
TB sabisiko bon·atna gita kamko ka·anio bakrimaniko on·china gita jolni dilgiparangko aro jolo songdongenggipa manderangko didiangengon, ia namjabegipa sabisiko bon·atna kam ka·anio manderangni bakrimaniko nangchongmota ine Sangma parakataha.
Ia tom·anio Mahendraganj CHC-ni dilgiparangba jinmana aganprakengon, ia health centre-o X-ray machine-ko aro samrangko nangdapengani gimin janapangaha.
Ia program-ko ong·atanio dongpae bakko ra·anggipa gipin manderangara, Zikzak-ni MDC Aktar Ali, District Tuberculosis Officer Dr EL Sangma, Health department-ni gitcham Joint Director Dr K Sangma aro gipinrang ong·a.