TURA: Tura-ni AB Mission Compound-o donggipa Miriam Russel Women’s College-ni bilsigni gapaniko adita salrangna skang maniangaha.
Ia manianio, West Garo Hills a·jani Additional Deputy Commissioner AVD Shira, mongsonggipa sokgipa ong·e jinmana aganprakangengon, da·o degree Arts College-ona ra·doatako man·gipa Christian Girls Higher Secondary School-o an·tangni poraiengmiting aro skigipani kamko ka·miting somoirangko gisik ra·atpilangaha.
Me·chikrangna namgipa lekka porako on·na gita rakbee kamrangko ka·ahani gimin Missionary-rangko mittelpilangengon, mikkangchi ia college-ko niksenggipa ong·atna aro kamtangtango chu·sokgiparang ong·na gita rakbate kamrangko ka·china college-ni chatrirangko aro skigiparangko Shira didiangaha. College-ni gadangoba skulni daka rikanirangko ja·rikangkuchina gitaba Shira didiangaha.
Ia tom·anio dongpae jinmana aganprakanggipa gipin manderangara, Health Services-ni gitcham Director aro da·o Tura Christian Hospital-ni Chairperson ong·enggipa Dr CB Sangma, A·chik Baptist Dal·gipa Krima-ni General Secretary Rev Janang R Sangma aro gipinrang ong·a.
Ia college-ni bilsigni gapaniko manianio, dingtang dingtang susaanirango chegiparangnaba certificate-rangko suale on·angjolaha.
Garo Hills-o me·chikrangni skanggipa college, Miriam Russel Women’s College-ko re·anggipa bilsio a·dokni Chief Minister Conrad K Sangma, kulie on·angahachim ine nikna man·a.