NEW DELHI: Garo Hills-ni gamchatbegipa lithium-ko bikotna gita India-ni Geological Survey, cholrangko nienga ine official-rang kobor on·aha.
Official-rangni report-o parakani gitade, Garo Hills baksana Jammu & Kashmir aro Chattisgarh a·dokrangonikoba lithium bikotna gita Geological Survey cholrangko nienga.
2023-24 bilsini Geological Survey-ni report-o parakani gitade, Chattisgarh-ni Korba a·ja, Meghalaya a·dokni South aro East Garo Hills aro Jammu & Kashmir a·dokni Jammu, Ramban, Resai, Rajoury aro Udhampur-oniko lithium bikotna gita cholrangko nienga.
Ia lithium-ara, electric garirangna lithium-ion battery-rangna jakkalgipa a·ningni bostu ong·achim aro da·o India a·songo electric-ni garirangko jakkalna miksonganirang dongengani gimin lithium-ara a·songna nangchongmotgipa gam ong·skaengaha.
Official-rangni u·iatani gitade, da·o dipet lithium-ko Reasi-osan nikna gita man·engkuachim aro ia biapo million ton 5.9-mangni gita lithium dongachim.
A·ningo nikronggijagipa gamrangko India-ni Geological Survey, am·sandianirangko dakengon, ia gamrangko Meghalaya, Chattisgarh, Maharashtra, Bihar, Jharkhand, Odisha, West Bengal, Arunachal Pradesh, Assam, Uttar Pradesh, Andhra Pradesh, Kerala, Telangana, Tamil Nadu, Karnataka, Gujarat aro Rajasthan a·dokrango dakenga ine official-rang u·iataha.
