TURA: South Garo Hills a·jani Gasuapara jolrango donggipa chatro chatrirangni namgnina, Gasuapara-o HSSLC centre damsako kulie on·china gita A·chik Holistic Awakening Movement (AHAM), a·dok sorkario dabiangaha.
Iani bidingo, Tura-o donggipa MBOSE-ni Controller of Examinations-na sedoatengon, MBOSE-ni dongimin niam gitade, chatro chatrirang porikkarangko dongimin centre-rangosa sena gita nangachim ine AHAM parakataha.
“Gasuapara Higher Secondary School, Sibbari Higher Secondary School aro Rugapara Higher Secondary School-rang gimikan an·tangtangni chatro chatrirangna Gasuapara-kon HSSLC centre-na namniktokaha. Ia skulrango poraienggipa chatro chatrirang, 2012 bilsionin West Garo Hills a·jao donggipa Dalu Government Higher Secondary School-osa HSSLC porikkako setokenga indiba ia skulrangara South Garo Hills a·jani ning·osa ga·akani gimin ia skulrangna dingtang porikka sechakani centre-ko kulina man·ode nambatgen,” ine AHAM, MBOSE-ni official-na sedoatgipa chittio parakataha.
Dalu-ara Gasuapara aro gipin skulrangoni kilometer 22-mangni gita chel·grikani a·sel chatro chatrirang re·ruraanio neng·nikanirangko chagrongna nangrongenga ine janapatengon, Gasuapara-o HSSLC centre-ko kulichina dabienggipani bidingo ta·raken ja·kuko de·china AHAM didiataha.
Indake ong·engon, Raksamgre constituency-ni ning·o donggipa Nengbapara songo health sub-centre-ko kulichina gita AHAM Bawagre sub-unit, Raksamgre constituency-ni MLA Limison D Sangma-na sedoatskaaha.
Iani bidingo Raksamgre MLA-na sedoatengon, Nengbapara jolrango donggipa manderang Tikrikilla CHC-onasa re·ange sanna bananirangko ra·na nangtokengani a·sel bang·a neng·nikanirangko chagrongna nangtokenga ine AHAM Bawagre sub unit janapatenba, Nengbapara songo health sub centre-ko kuligenchimode ian Nengbapara, Bawagre, Uringgre, Ajurigre, Tosinpara, Rongmakgre, Angke Rongdikgre, Dildegre, Songgitchamgre, Jengritgre aro uandakgipa songrango donggipa manderangna bang·en namgni ong·pagenchim ine parakataha.