SHILLONG: Meghalaya a·doko niam gri napsrukanirangko champengna gita Inner Line Permit (ILP)-ko ra·gate on·kujaskal rel garirangko ra·napbana on·kujawa ine KSU aro uandakgipa dingtang dingtang dolrang jegalsotokengon, a·dokona aro mongsongbate a·dokni skotong Shillong songjinmaona rel garirang re·baahaode, manderangni nangchongmotgipa bosturangni damrangba komignokchim ine a·dokni BJP Minister AL Hek parakataha.
A·doko niam gri napsrukanirangko champengna gita ILP-ko ra·gatchina dingtang dingtang dolrang dabitokengani gimin janapatengon, Meghalaya a·dokara national highway-rangchi Assam-ni Barak Valley, Tripura aro Mizoram a·dokrang baksaba nangdimeatako man·gipa a·dok ong·ani gimin a·doko ILP-na batede Meghalaya sorkarini ra·gatenggipa Meghalaya Residents Safety & Security (MRSSA)-an nambatgipa ong·enga ine Hek parakataha.
Hek-ni parakatani gitade, Meghalaya a·doko nok para ra·e dongenggipa manderangko name nirok sandianichi a·doko songdongenggipa manderangko chel·chakna gita a·dok sorkari, ia MRSSA 2016-ko ra·gatahachim.
Ia sal somoirango rel garirangan chel·e songrena gita dam komibatgipaba ong·enga ine janapatskaengon, a·dokona rel garirangko ra·baaniara a·dokni namroro silroroaninasa ong·enga aro namroro silroroanikode darangba champengna gita nangja ine BJP MLA parakataha.
A·doko niam gri napsrukanirangkode joltangtangni manderang aro dilgiparang an·tangtangba champengna man·a ineba ua aganaha.
East Jaintia Hills a·jaona rel rama taribana chanchianiko sorkari galaha ong·ja aro iani bidingo dingtang dingtang dolrang baksa agangrikengkua ine adita salrangna skangsan, a·dokni Deputy Chief Minister aro Transport Minister Sniawbhalang Dhar parakatahachim.
East Jaintia Hills a·jaona rel gari ra·baani bidingo a·dok sorkari, dingtang dingtang dolrang baksa agangrikchenggen ineba ua parakataha.
