U·IATTIMGIPAONI
WILLIAMNAGAR: Sombar salo, a·dokni Chief Minister Conrad K Sangma, a·dokni PHE Minister aro Williamnagar-ni MLA Marcuise N Marak baksana Rongjeng MLA Jim Sangma-ni dongpaanio, Williamnagar Municipality Board-ni gital office aro Market Complex-ko do·ga oe on·angaha.
Ia gital office aro Market Complex-ko kulie on·angani somoio a·dokni Chief Minister, tom·anio bak ra·giparangna aganprakangengon, a·doko songdongenggipa manderangni nangnikanirangko ma·sichake, iandakgipa kamrangko chu·sokate on·enga aro ia kamrangko somoi gita matchotatna jotton ka·enga ine parakataha.
“Chingni sorkari, a·dokni dingtang dingtang biaprango manderangni nangnikani gita nokrangko, rama jal·langrangko aro uandake dingtang dingtang nanganirangko chu·sokatna rakbee kamko ka·enga. Ian a·doko songdongenggipa manderangko mangrakbatatna, namroro silroroaniko ra·bana aro a·doko songdongenggipa mande sakantinan nambata janggi tangani cholko on·na chingni kam ka·aniko mesokani ong·enga,” ine Sangma aganaha.
Nokrang aro rama jal·langrangan songo noko namroro silroroaniko ra·baani cholrang ong·a ine janapatengon, iandakgipa namroro silroroani cholrangchi manderangna janggi tangani cholrangkoba on·na man·a ine Chief Minister parakataha.
“Ia namroro silroroanioniko a·doko songdongenggipa mande sakantina namgniko ra·baaniara chingni daitoan ong·a. Meghalaya a·dokni manderangna ia sorkari, gital chasongni kolrangko, namgipa lekka poraniko aro an·seng baljokaniko on·na niksamsoani gnang kam ka·enga,” ine ua aganaha.
Ia Williamnagar Municipal Office aro Market Complex-ko kulie on·aniara jolo songdongenggipa manderangna nambata cholrangko on·anio re·mikkangani ong·enga ineba Chief Minister parakataha.
Chatro chatrirangna nambata skie ra·ani cholrangko on·na gita sorkari, East Garo Hills a·jao gitchambatsranggipa Rongrenggre Higher Secondary School-ko gital dake taridapgen ineba Chief Minister parakataha.
“Skul nokrangko namdapataniara chingni mongsonggipa daitoan ong·enga aro ia Rongrenggre Higher Secondary School-ko taridape on·anian chingni chadamberangna namgipa lekka porako on·na on·kanganiko mesokani ong·gen,” ine Sangma aganaha.
