U·IATTIMGIPAONI
SHILLONG: Meghalaya a·doko bobil dake chakatgipa dolrangko sorkari bilaken champengangkugen ine Mongolbar salo, a·dokni Cabinet Minister Ampareen Lyngdoh parakataha.
Khasi aro Jaintia Hills a·jarango gital dake bikotgipa National Liberation Council of Nongkyndong (NLCN) bobil dolni manderangko adita salrangna skang rim·na man·ahani gimin Lyngdoh, ia kattarangko aganaha.
A·doko bobil dake chakatgipa dolrangko champengna gita rake kamrangko ka·angkugen ine janapatengon, a·doko bobil dake chakatna jotton ka·gipa dolrangko champengna sorkari nirikkie kam ka·enga ine Lyngdoh parakataha.
“Meghalaya a·doko iandakgipa kamrangko champengna chinga rakbee ja·kurangko de·angkugen aro iandakgipa dolrangko ong·katna on·jawa,” ine ua, kobor ra·timgiparangna aganaha.
NLCN bobil dolni manderangko rim·anian a·doko bobil dolrangko bikotna miksongenggipa manderangna mesokani ong·aha ine janapatengon, a·doko bobil dake chakatgipa dolrangko sorkari aro a·dokni manderangba jegalangkugen ine Cabinet Minister aro MDA sorkarini ku·wattimgipa parakataha.
A·doko kamrangko ka·e cha·na cholrangko man·jaengani giminsa ia bobil dolko bikotahachimma ine sing·anina aganchakaniko on·angengon, kamrangko ka·e cha·na cholrang dongjagenchimoba a·songni kosako bobil dake chakatanide chol ong·jawa aro batesa obostarangko namjabatatani gita ong·a ine Lyngdoh parakataha.
“Pilak a·songrangon kamrangko tikate on·anide ra·biani ong·aia aro pilakan an·tangtangna janggi tangani cholrangko dake ra·na nangao ga·aka. A·song ge·antion ia neng·nikanikode man·a aro iana bobil dake chakatanide chol ong·jawa,” ine ua aganaha.
Khasi aro Jaintia Hills a·jarango gital bikotgipa NLCN bobil dolni sak 11 manderangko adita salrangna skangsan police-rang rim·na man·ahachim aro ia sak 11 manderangoni saksade bilsi sokkugijagipa chadambe aro saksade an·o donggipa me·chik ong·achim ine nikna man·a.
Police official-rangni parakatani gitade, ia gital NLCN bobil dolko adita sak Khasi aro Jaintia chadamberang bikotahachim aro ia bobil dol, Nagaland a·dokni bobil dolrang baksaba bak dongachim.
