U·IATTIMGIPAONI
SHILLONG: Songadam nokadamrango donggipa pilak nokdangrangna chirangko sale on·na gita ma·mong sorkarini ra·gatgipa Jal Jeevan Mission (JJM)-ni kamrang, Meghalaya a·doko 56.39 percent-ni gita matchotaha ine Mongolbar salo, a·dokni PHE Minister Marcuise N Marak parakataha.
Iani bidingo kobor ra·timgiparangna talataniko on·angengon, Meghalaya a·doko te 6,51,556 nokdangrangna chirangko sale on·na nisan donaoni da·o dipet te 3,67,447 nokdangrangna chi pipe-rangko sale on·na man·aha ine Marak parakataha.
“Chingni nisan donsogimin pilak nokdangrangna 2024 bilsini January jani gisepon chi pipe-rangko sale on·na chinga somoiko donmanaha,” ine PHE Minister aganaha.
PHE Minister-ni parakatani gitade, East Khasi Hills, East Jaintia Hills, West Jaintia Hills, South West Khasi Hills aro Garo Hills-ni mitam a·jarango donggipa adita songrangna da·o sorkari, bijoli sale on·anikosa sengskana nangengachim.
Ia songrango chi pipe-rangko salmanahani gimin da·o bijolirangko sale on·na man·ahaode komibeoba te 80,000 nokdangrangna chirangko on·na man·gnok ineba Marak parakataha.
JJM-ni kamna nangenggipa tangka paisarangni gimin janapatskaengon, tangka paisarangni bidingo uamang ma·mong sorkari baksa agangrikmanahani gimin tangka paisani gitade maming neng·nikanirang dongjawa ine PHE Minister parakataha.
“Chingni mongsonggipa miksonganide ma·mong sorkarini dongimin somoi gita kamko matchotatanisa ong·enga,” ine Marak aganaha.
Ia JJM-ara, 2024 bilsini gisepon songadam nokadamrango donggipa pilak nokdangrangna chi pipe-rangko sale on·na gita 2019 bilsini August jao a·songni Prime Minister Narendra Modi-ni a·bachengatgipa program ong·achim ine nikna man·a.
JJM-ni ning·o chi pipe-rangko sale on·na gita re·anggipa April jaoba Jal Shakti Ministry, gong kror 299.24 tangkarangko Meghalaya a·dokna gittamgipa changna chame on·atahachim.
A·doko JJM-ko matchotatahani gimin Meghalaya a·dokmangmangsan iandake gittamgipa changna tangka paisarangko man·dapahachim.