U·IATTIMGIPAONI
TURA: West Garo Hills a·jao Dalu block-ni ning·o donggipa Purakhasia Puranbazar village employment council (VEC)-ni job card holder-rang, 2022-2023 bilsirango kamrangko ka·ani ja·manba saldok-salsni aro una bateba an·tangtangni hajirarangko man·tokkujaenga ine matnangataha.
Purakhasia Puranbazar VEC-ni job card holder-rangni parakatani gitade, ua somoio VEC-ni secretary an·tangan tangka paisarangko oke, job card holder-rangna hajirarangko gamrongachim indiba VEC-ni secretary, hajirarangko gamengon, pangnan sal 10-ni ong·ode salskuni hajirarangkosan gamrongaiaha aro iandake job card holder-rangko cha·bokna jotton ka·aha ine VEC president-oniko ma·sina man·aha.
“Chingni kobor man·soani gitade, ua mitam job card holder-rangni bimingrangkoba maming a·sel gri kimite galrongachim indiba adita salrangna skang, VEC-ni president, jinmako okame tom·aniko ong·aton, secretary-ni tangka jakkalsretanirangko aro job card holder-rangko cha·bokna jotton ka·anikoba ma·sina man·aha. Ia tangka paisarangara kangal cholgrirangna kam ka·e cha·na on·atgipa tangka paisarangsa ong·ani gimin songni manderang secretary-ni kosako ka·a ding·chaotokaha,” ine Purakhasia Puranbazar VEC-ni job card holder-rang parakataha.
Indake ong·engon, VEC-ni secretary-ni kamni bidingo ta·raken inquiry-ko dakchina aro ua dos donga ine nikgenchimode uni kosako rakgipa ja·kurangko de·china gita job card holder-rang dabiangtokaha.