Mongmarangko ripingchina SGH DC didia
U·IATTIMGIPAONI
BAGHMARA: Niam gri matburing badinganiko bon·atna gita miksonganio South Garo Hills a·jani Balpakram National Park office-ni gita, Wildlife Trust of India baksa nangrime Budbar salo, ‘World Elephant Day’-ko Baghmara-ni District Sports Playground-o maniangaha.
Ia program-ko ong·atanio South Garo Hills a·jani Deputy Commissioner S Awasthi, program-o bak ra·giparangna aganprakangengon, mongmarangni mitam ma·malrangde gimaangengahani gimin ia mongmarangko da·onin ripinge rakkina kam ka·jagenchimode da·alo an·ching jekai dinosaur aro gipin gimagimin matburingrangko noksarangosan nikna man·engaha gitan mikkangchi an·chingni dedrang su·drangrangba mongmarangko noksarangosan nikna man·aignok ine mikrakataniko on·angaha.
India a·song gimiko mang 30,000-mangni gita mongmarang donga aro ianoni mang 1600 ba 1700-mangni gitade Meghalaya a·dokon ong·a ine janapatengon, ian a·song gimikko nigope an·chingni a·dokon mongmarangni bang·bataniko mesokani ong·enga ine Awasthi parakataha.
“Uni gimin mongmarang gimaroroangani pal bang·batrorona gita ian an·chingni daito ong·enga,” ine South Garo Hills DC aganaha.
Buring bolgrimrang porongrong ong·roroangengahani a·sel mongmarang re·ruraanirango neng·nikanirangko chagrongna nangtokenga ine janapatengon, mongma ramarango manderang songdong a·chajana gita aro bagan barirangko dake cha·jana gita rake kamko ka·china DC, Forest official-rangko didiangaha.
Adita salrangna skang, BSF sipai saksako mongmarangni doke siatgipani gimin janapatengon, mongmarangko chagrongani somoirango dakna nanggni aro dakna nanggijanirangko manderangna ma·siate on·na gita awareness program-rangko ong·atjringchina DC, Forest official-rangko didiangaha.
Ia World Elephant Day-ko maniani bak gita dingtangmancha Raksam aro Te·gite Maharini gisepo robol kal·susaanikoba ong·atangaha aro ia kal·susaanio Raksam Mahari, Te·giteko goal 3-chi cheaha.
Ia tom·anio dongpae jinmana aganprakanggipa gipin manderangara, Balpakram National Park-ni Director Rimse K Sangma, Wildlife Trust of India-ni Assistant Manager BT Sangma aro gipinrang ong·a.