U·IATTIMGIPAONI
SHILLONG: Meghalaya a·dokni quota gita MBBS seat-na open category-o gipin jatrangba biaprangko man·enga ine Budbar salo, Khasi Students Union (KSU) sing·doataha.
KSU-ni general secretary Donald V Thabah-ni parakatani gitade, screening-na okamatako man·gipa sak 14 candidate-rangoni sakgittamsan a·doktangni Tribal candidate-rang ong·achim aro gipinrangde gipin jatrangonisa ong·achim.
“Ia sak 11 candidate-rangara Meghalaya a·dokoni ong·ja indiba Assam-onisa ong·na nanga ine chinga badi ka·anirangko man·soaha. Ia candidate-rang, an·tangtangni lekkarangko South West Garo Hills a·jani Ampati-oniko man·ahakon chanchichiptokenga,” ine Thabah aganaha.
Iani bidingo a·dok sorkari talatanirangko on·na nangchongmota ineba KSU dabiangaha.
Ia sak 11 candidate-rangni Aadhar aro EPIC card-rangko aro ia candidate-rang bano higher secondary gadangrangko pass ka·achim, pilakkon jinmana parakna nanga ineba KSU dabiangaha.
KSU general secretary-ni parakatani gitade, ‘open category’-ara a·doko songdongkamgipa aro Scheduled Tribe (ST) candidate-rangna miksonge dongipa biaprangsan ong·aiachim.
Ia open category-o Khasi chatro chatrirang biapko man·genchimode Khasi-Jaintia category-o gipin chatro chatrirangnaba cholrangko on·na gita man·genchim ine janapatengon, “Ia sak 11 candidate-rangni a·selan da·o Khasi-Jaintia aro Garo category-ni chatro chatrirang, MBBS-ko poraina gita cholrangko man·tokjanaba dongaha,” ine Thabah parakataha.
Sak 170 Medical & Health Officer (M&HO)-rangko aro sak 100 specialist doctor-rangko contractual basis-o rakkina gita walk-in interview-ko ong·atna sorkarini parakatahani gimin sing·doatengon, iako dakanichi MBBS-ko poraia matchotdaldale re·bagipa a·doktangni doctor-rangna nangchakeaniko ra·baskagnok ine KSU-ni general secretary suk ong·gijaniko parakataha.
“A·doktangni MBBS doctor-rangnasa skanggipa cholko on·chengna nanga aro ia candidate-rangko a·songni aro salgro salaramni gipin doctor-rang baksa apsan category-o donatna nangja,” ine Thabah aganaha.
