U·IATTIMGIPAONI
SHILLONG: Bristibar salo, a·dokni Health & Family Welfare Minister Ampareen Lyngdoh, University Hospital of Ayurveda & Naturopathy (UHAN)-ko University of Science & Technology Meghalaya (USTM) campus-o kulie on·angaha.
Ia ge 100 palang donggipa Ayurvedic Hospital-ko kulie on·angani somoio a·dokni Health Minister, jinmana aganprakangengon, USTM campus-o ia UHAN-ko kulianiara Meghalaya a·dokni manderangnasan ong·aigija salgro salaram jol gimikni manderangnan namgni ong·gnok ine parakangaha.
“UHAN-o Ayurvedic samrangchi sanna banani cholrang namen aiao inmanbegipa ong·a aro ian an·ching salgro salaram jolrango donggipa manderangna bang·en namgni ong·gnok,” ine Lyngdoh aganaha.
Bakkandikbegipa somoion USTM-ni niksenggipa ong·ahani gimin mittelpile aganangskaengon, USTM-ni Chancellor Mahbubul Hoque gita niksamsoani gnang kam ka·gipa mande baksa bakrimna man·aniara Meghalaya a·dokna namen rasong gnangbeani ong·a ine Health Minister parakataha.
“A·gilsakni seng·anikode an·ching brena amja indiba tikkelanichisa man·a. USTM Campus-o a·bachengatna sienggipa PA Sangma International Medical College & Hospital-na Meghalaya sorkari pilak nanga dakchakanirangko on·anggen,” ine Lyngdoh parakataha.
