U·IATTIMGIPAONI
WILLIAMNAGAR: Garo Hills Autonomous District Council (GHADC)-ni chief executive membor aro Tourism branch, tangka paisarangko chu·gimik on·jahani a·sel Nongalbibra guest house-ko rikgipa contractor, kamrangko matchotatna man·jaha ine East Garo Hills a·jani A·chik Organisation for Social Welfare (AOSW) matnangataha.
AOSW-ni organizing secretary Endick M Marak-ni parakatani gitade, ia guest house-ko rikani bidingo ua RTI ka·e am·sandion, ia kamko saksa Clever A Sangma minggipa contractor-na 2017 bilsini December 11 tariko on·e, kamko sal 90-ni gisepon matchotatchina gita ge·etaniko on·ahachim. Ia guest house-ko rikna chamgipa chu·gimik tangkara gong lak 38 ong·achim indiba ia nokko rikgipa contractor-na gong 22,80,000-kosan running bill dake on·aiaha ine Marak parakataha.
“Ia guest house-ko rikani bidingo anga an·tangan contractor-ko gronge sing·sandion, una skanggipa bakni tangkarangkosan gamaiaha aro bangki tangkarangkode una gamjaha ine ua angna aganchakaha. Una on·gipa tangkarangchi ua jedakeba ia kamko matchotatna jotton ka·ahachim aro ua an·tangni matmarangko aro gue baganrangko palpileba ia kamko matchotatna jotton ka·ahachim indiba GHADC-ni CEM aro Tourism department, una bangki tangkarangko gamchipjahani a·sel ua ia kamrangko matchotatna man·jaha ine ua angna aganaha,” ine AOSW-ni organizing secretary talataniko on·angenba, iani bidingo contractor an·tangan GHADC-ni CEM-ko grongeahachim indiba ua an·tangan an·tangni tangkachi kamko matchotatna nanggen aro kamko matchotjagenchimode bangki tangka paisarangko man·jawa inesa aganchakataiaha ine parakataha.
Indake ong·engon, ia apsan contractor-an South Garo Hills a·jani Tobeng A·brio View Point-ko gong lak 4 ong·e aro NH-62 ramaoni Danang Boldakgittim-ona dakanggipa kutcha ramao gong lak 5-ni RCC culvert-koba tariahachim indiba ua da·alonan an·tangni man·na nanggipa tangka paisarangko man·chipjaha ine AOSW parakataha.
