U·IATTIMGIPAONI
AMPATI: Sukrobar salo, South West Garo Hills a·jani District School Education Office-ni gita dingtangmancha misirangni gamchatgipa ong·ani gimin District Level Science Seminar-ko Ampati-ni Multi Facility Centre-o ong·atangaha aro ia seminar-ko ong·atanio South West Garo Hills a·ja gimikoni damsku skulrang bakko ra·angaha.
Ia Science Seminar-ko ong·atanio chatro chatrirangni exhibition, PPT & Paper Chart Presentation, viva aptitude test aro written aptitude test-rangkoba ong·atangaha, jeon chatro chatrirang, misirangni be·enna namgipa ong·ani bidingo mesokna gita cholrangko man·aha.
Ia Science Seminar-ko South West Garo Hills a·jani ADC YW Momin a·bachengate on·angaha aro ia seminar-ko ong·atanio bak ra·e, an·tangtangni u·i-ma·sianirangko jinmana mesokahani gimin chatro chatrirangko mittelpilangaha.
Ia seminar-ko ong·atani bak gita dingtang dingtang susaanirango chegiparangnaba ja·mano certificate aro trophy-rangko on·angaha.