U·IATTIMGIPAONI
TURA: August-ni 25 aro 26 tarikrango salgnina Re·mikkang Youth Club, West Garo Hills District Administration, Don Bosco College, Meghalaya Basin Management Agency (MBMA), Prime Hub aro Meghalaya Basin Development Agency (MBDA) baksa bakrime, Entrepreneurship Encouragement & Development Program-ko Don Bosco College of Teachers Education Hall-o ong·atenga.
Ia program-ko a·bachengatani somoio, West Garo Hills a·jani Deputy Commissioner Jagdish Chelani mongsonggipa sokgipa ong·e, jinmana aganprakangengon, bading chiwalgiparang ong·na gita an·tangtangni changa sapani aro u·i-ma·sianirangko jakkalchina gita chatro chatrirangko didiangaha.
“Bading chiwalgiparang ong·na gitade skanggipa na·a an·tangni neng·nikanirangko ma·sichenge, ia neng·nikanirangko namatchengna man·na nanga. Namatani cholrangko sandiengon, chanchibewalanichi dingtang dingtang neng·nikanirangko namatna gita na·a cholrangkoba man·gen,” ine Chelani aganaha.
Ia program-ko ong·atanio Don Bosco College-ni Principal Fr Bivan Rodriques Mukhim-ba jinmana aganprakangengon, Garo Hills-o ong·telaigipa biaprangchi aiao inmanbegipa biaprangko ong·atani gimin aganangaha. Bading chiwalgiparang ong·na gita cholrangko sandiani bidingo janapatengon, joltangtango man·gipa cholrangkosa sandichina gita Fr Mukhim, chatro chatrirangko didiangaha.
Ia program-ko a·bachengatanio dongpae jinmana aganprakanggipa gipin manderangara, Don Bosco College of Teachers Education-ni Principal Fr Pius Varghese, Re·mikkang Youth Club-ni president Salrakh G Sangma aro gipinrang ong·a.
Ia workshop-ko ong·atanio Don Bosco College-ni chatro chatrirang, Wangala chrokachi manderangko an·saoatangaha.