U·IATTIMGIPAONI
TURA: Garo Hills-o B.Sc Nursing aro GNM-ko recognize ong·gipa institute-rangoni pass ka·gipa candidate-rang dongja ine pa·sike, Mid-Level Health Provider (MLHP)-ni kamrango gipin biaprangoni Non-Tribal candidate-rangko rimnapahani gimin Garo Hills-ni Senior Citizens Forum, Garo Graduates Union, New Tura Development Forum (NTDF) aro uandakgipa dolrang raken jegalatenba, iani bidingo Garo Hills-ni manderangna talate on·kujaskal, ia manderangko kamo ra·aniko dontongkuchina gita a·dokni Chief Minister Conrad K Sangma-na sedoataha.
Iani bidingo Chief Minister-na sedoatengon, ia kamna qualify ong·gipa A·chik candidate-rang dongjani gimin gipin biaprangoni dorgasto galgipa candidate-rangsa man·aha ine a·kanganiara namen ong·ja maina Garo Hills-o M.Sc Nursing aro GNM-ko recognize ong·gipa institute-rangoni pass ka·gipa candidate-rang bang·en dongachim ine NGO-rang parakataha.
MLHP-ni kamna seokako man·gipa gipin jat candidate-rangara A·chikkuko man·giparang ong·jani gimin saenggipa manderangko sanna bananio neng·nikanirangko chagrongna nanggen aro ia candidate-rangara gipin biaprangonisa ong·ani gimin salanti kamrangko ka·anio neng·nikanirangko chagrongna nanggen ineba NGO-rang parakataha.
Kamna seokako man·gipa candidate-rangoni saksaba training-ni short course-ni bidingo ma·sigiparang ong·ja aro ia candidate-rangni biapo A·chik candidate-rang ong·genchimode Tura-ni TB Hospital-oba Training Hall dongchapani gimin training-ko on·na man·genchim ineba NGO-rang, Chief Minister-na sedoatgipa chittio parakataha.
Ia kamna advertisement on·aniko ba interview-ni bidingo Garo Hills-ni candidate-rang ma·siriktokjahakon ine janapatskaengon, iarangni bidingo talataniko on·kujaskal, ia candidate-rangni kamo join ka·aniko dontongatchengna nanga, ong·jaode Meghalaya a·doko songdongenggipa dingtang dingtang jatrangni gisepo meligrikgijanirang ong·katnaba gnang ine NGO-rang parakataha.
