U·IATTIMGIPAONI
SHILLONG: NITI Aayog-ni Delta Ranking-o Meghalaya a·dokni Ri Bhoi a·jakoba a·song gimiko nambatsranggipa dambonga a·jarangoni damsa ine segatahani gimin Ri Bhoi a·jao sorkarini medical college-ko kulichina gita Nongpoh-ni UDP MLA Mayralborn Syiem, nangnikenganiko parakaha.
Ri Bhoi a·jani University of Science & Technology Meghalaya (USTM) campus-o private medical college-ko kulina siengahani gimin ian a·dokni chatro chatrirangna MBBS degree-ko dakna gita namgipa chol ong·gnok ineba Syiem parakataha.
Ri Bhoi a·jao private medical college-ko kuliengahani gimin an·tangni kusi ong·aniko parakatengon, “Ri Bhoi a·jao sorkarini medical college-ko kulichina nangnikaniba bon·kujawa aro ia nangnikani changsaode chu·sokgipa ong·gen ine chinga ka·dongenga,” ine Syiem aganaha.
Manderangni nangnikanirangde bon·changjawa ine janapatskaengon, Ri Bhoi a·jara a·songo ka·dongna man·gipa a·jarangoni damsa ong·engani gimin batanggimin bilsi gni ba gittammangna skangonin ua Ri Bhoi a·jao sorkarini medical college-ko kulina man·gen ine aganengachim ine Nongpoh MLA parakataha.
Ia nangnikaniko chu·sokgipa ong·atna gitade, district hospital-rango palangrang aro gipin nanganirangko chu·sokatchengna nanggen ine janapatengon, da·o dipet Nongpoh Civil Hospital-o medical college-na nanganirang chu·ongkujaenga ine Syiem parakataha.
“Indake ong·genchimoba, mikkangchi Nongpoh district hospital-ko medical college-ona ra·dona gita ia pilakan chu·sokgipa ong·na chinga ka·dongenga,” ine Nongpoh MLA aganaha.
Meghalaya a·doko damgittam medical college-rangko kulina siengahani gimin ian a·dokna namgni ong·gnok ineba Syiem parakataha.
Nongpoh MLA-ni aganani gitade, ian Chief Minister Conrad Sangma aro Health Minister Ampareen Lyngdoh-ni dilanichi kamrang chu·sokna man·enga ine mesokaniba ong·engachim.
“Ia medical college-rangko a·dok sorkarini kulina nangnikaniara a·doko doctor-rangni chu·onggijaniko namatna miksonganian ong·enga aro anga bebera·a ia medical college-rango poraie MBBS degree-ko man·gipa chatro chatrirang, sorkarini chalaigipa health centre-rango dangdike on·skana nanggen,” ine Syiem aganaha.
