U·IATTIMGIPAONI
TURA: Garo Hills Autonomous District Council (GHADC)-o kam ka·enggiparang, ja 30 ong·pile dormaharangko man·tokkujaengani gimin dormaharangko September 15 tarikni gisepo on·jagenchimode, kamrangko dontonge jingjengatna ka·mikkenataniko on·angaha.
Mongolbar salo GHADC-ni Non-Gazetted Employees Association (NGEA)-ni dilgiparang, chief executive membor (CEM) Albinush Marak-ko gronge agangrikani ja·man, September 15 tarikni gisepo dormaharangko on·jagenchimode kamrangko dontonge jingjengatna tik ka·angaha.
NGEA-ni parakatani gitade, GHADC-o kam ka·enggiparangna September jao dormaharangko on·gen ine GHADC-ni CEM ku·rachakaniko on·atahachim indiba batanggimin somoirangoba iandake kam ka·giparangni dormaharangko on·na ku·rachakani ja·manoba chu·sokatrongjahani gimin September 15 tarikni gisepo dormaharangko on·jagenchimode kamrangko dontonge jingjengatna tik ka·angaha.
“Chinga an·tangtangni dormaharangko man·gija da·o ja 30 ong·pilengaha indide maikai chinga janggi tangna man·gen? Chingoba nokdang donga aro dedrangrang dongpaa, dedrangrangni skul fee-rangko chinga maikai gamna man·gen?” ine NGEA-ni dilgipa Brithen M Sangma sing·doataha.
Ia sal somoirango pilak bosturangni daman namen rakaha indiba GHADC-o kam ka·giparangde ja 30 ong·pile dormaharangko man·jaengani a·selan cha·a gri ringa gri ong·na nangtokengaha ineba ua parakataha.
“Indita jarangna dormaharangko man·jagenchimode sawa chingna tangka paisarangko sro-snamnaba on·kugen? Chingni dedrangrangni skul fee-rangkoba chinga indita jarangna gamchipna man·gija dongna nangenga indide chingni dedrangrangara maikai skulrango poraipana man·gen?” ineba Sangma sing·doataha.
Indake ong·engon, GHADC-o kam ka·giparangna ku·rachakgimin 5th pay commission-koba da·onan on·gija 4th pay commission-kon on·kuengani gimin NGEA suk ong·gijaniko parakataha.