U·IATTIMGIPAONI
SHILLONG: Matnanga gri ong·gipa candidate-rangna medical seat tikataniko bakan sorkari parakatgen ine Mongolbar salo, a·dokni Health Minister Ampareen Lyngdoh parakataha.
Gipin a·dokrangoni mitam candidate-rang, South West Garo Hills a·jani Ampati-oniko lekkarangko man·ani ja·man Meghalaya a·dokni quota-o medical seat-rangna dorgasto galaha ine adita salrangna skangsan, Khasi Students Union (KSU) matnangatahachim ine nikna man·a.
Indake ong·engon, health department-ni official-rang, law department aro a·dokni Chief Secretary baksa tom·e chanchirimaha aro je chatro chatrirangan matnanganirangko man·jaengachim, uandakgipa candidate-rangnade medical seat sualaniko bakan sorkari parakatgnok indiba je candidate-rangkon scrutiny ka·na gita nangengachim, uandakgipa candidate-rangnade sorkari adita somoiko nangkugen ine Health Minister parakataha.
Law department-ni nirokanio sorkari, dingtangmancha scrutiny committee-ko songaha ine janapatengon, je candidate-rangkon niamo pangchake seokahachim, uandakgipa candidate-rangnade seat-rangko sualatna gita sorkari ta·raken kamko ka·enga ine Lyngdoh parakataha.
Mid-Level Health Provider (MLHP)-ni kamna seokanio A·chik nurse-rangkode nichanggalaha ine matnangenba, Tura-ni BJP MDC Bernard N Marak-ni Union Health & Family Welfare Minister Mansukh L Mandaviya-na sedoatgipani bidingo sing·anina aganchakaniko on·angskaengon, iani bidingo advertisement-ko on·aha aro jerangan dorgastorangko galahachim, nanga gita biaprango rimnapaha ine Lyngdoh parakataha.
Garo Hills-ni qualify ong·gipa nurse-rangko MLHP-ni kamna ra·anio galchangaha ine matnanganirangko man·ahani gimin sorkari, dingtangmancha Garo Hills-o walk-in interview-ko September 4 tariko ong·atna sorkari tik ka·aha ineba Health Minister parakataha.
Candidate-rang jemangan Community Health-ni certificate-rang dongjachim, uandakgipa candidate-rangna sorkari, dingtangmancha jadokni certificate training-ko on·na tik ka·aha ineba ua parakataha.
