U·IATTIMGIPAONI
TURA: Selsella jolo songdongenggipa manderang, Shillong aro Guwahati songjinmarangona songrena nangani somoirango Selsella-oni joljol re·gipa bus garirang dongkujaengani a·sel neng·nikanirangko chagrongna nangtokenga ine A·chik Students Welfare Association (ASWA) parakatenba, Selsella-oni Guwahati gita Shillong-ona re·gipa MTC bus gariko on·china a·dokni Deputy Chief Minister aro Transport Minister Sniawbhalang Dhar-ko mol·molataha.
A·dokni Transport Minister-na seatgipa chittio, ASWA-ni president HN Sangma-ni parakatani gitade, da·o dipet Selsella-oni Guwahati aro Shillong songjinmaona re·gipa bus garirang dongkujaengani a·sel Selsella, Kalchengpara, Rochonpara, Balachanda aro uandakgipa samba jolni manderang, mongsongbate Shillong, Guwahati aro gipin a·dokrango poraienggipa chatro chatrirang, neng·nikanirangko chagrongna nangtokengachim.
“Selsella-oni Shillong aro Guwahati-ona re·gipa bus garirang dongkujaengani a·sel chatro chatrirangsan ong·aigija bading chiwale cha·enggipa manderang, jemangan salanti Guwahati aro Shillong songjinmarangona re·rurana nangengachim, uandakgipa manderangba re·ruraanirango bang·en neng·nikanirangko chagrongna nangtokenga. Selsella-oni Guwahati gita Shillong-ona re·gipa MTC bus gariko on·genchimode gipin biaprango poraienggipa chatro chatrirang, bading chiwale cha·enggiparang aro office-rango kam ka·enggipa manderangnaba bang·en dakchakani ong·genchim,” ine Sangma parakataha.
Selsella-oni Guwahati gita Shillong-ona re·gipa bus gari donggenchimode ian jolo songdongenggipa manderangna re·ruraanirangko altubatataniko on·anisan ong·aigija ia jolrango namroro silroroaniko ra·bana dakchakaniba ong·genchim ineba ASWA-ni president parakataha.
“Da·o dipet Selsella-oni Guwahati ba Shillong-rangona re·gipa bus garirang dongkujaengani gimin bading chiwalani, lekka porani aro kamrangko man·anioba neng·nikanirangko chagrongna nangenga indiba Selsella-oni Shillong ba Guwahati-ona direct re·gipa bus garirang donggenchimode ia pilak kamrangon dingtanganiko nikna man·genchim,” ine Sangma parakataha.