U·IATTIMGIPAONI
TURA: Selsella-o PHE-ni Division office-ko kulichina aro Water Supply Scheme-rangko ta·raken taripile on·china gita didie A·chik Students Welfare Associaton (ASWA), a·dokni PHE Minister Marcuise N Marak-na sedoataha.
Selsella-o PHE-ni Division office-ko kulichina didiatengon, Selsella jolrango mandeni jelbra jelsuanirang batroroengan baksana manderangna chiko nanganiba batroroengahani gimin ia jolo PHE Division office-ko kulina man·genchimode songni nokni nangani kri kamrangko ka·togenchim ine ASWA-ni president HN Sangma parakataha.
Selsella Greater Water Supply Scheme-rango PHE office-ko kulichina didiatskaengon, “Selsella Greater Water Supply Scheme-ko a·bachengataonin ia scheme-na office aro officer-rang dongjani a·sel ia nangchongmotgipa water supply scheme-rangko nirokgiparang aro name chalaitimgiparang dongjaenga. Uni gimin ia Selsella Greater Water Supply Scheme-rango PHE office-ko kulie, qualify ong·gipa officer-rangko donatchina anga mol·molatenga,” ine Sangma parakataha.
Indake ong·engon, Selsella jolo donggipa Damalgre aro Amguri songrango rikgipa Deep Tube Well-rang nosto ong·ahani gimin ia tube well-rangkoba ta·raken taripile on·china gita ASWA dabiangaha.
“Ia songrango rikgipa Deep Tube Well-rang nosto ong·e dongengani a·sel songni nokni manderang chirangko man·jae neng·nikanirangko chagrongna nangtokenga, uni gimin ia jolrango songdongenggipa manderangni namgnina ia tube well-rangko ta·raken taripile on·china anga mol·molatenga,” ine ASWA-ni president, PHE Minister-na sedoatgipa chittio parakataha.
