U·IATTIMGIPAONI
TURA: Ganol chibisikrangko tangatpilna aro ripingna gita sorkarini ra·gatgipa Payment for Ecosystem Services (PES)-na gnigipa bakni cheque-rangko Sukrobar salo, a·dokni Chief Minister Conrad K Sangma-ni jakchi dingtang dingtang songrangna, Tura Dakopgre-o donggipa SMELC building-ko suale on·angaha.
Ia salni bako gimik gong lak 64.82-ni cheque-rangko dol 18 Village PES Committee (VPC)-rangna Chief Minister, suale on·ataha.
Ia PES scheme-ni cheque-rangko suale on·anganio a·dokni Chief Minister, jinmana aganprakengon, samtangtango ong·telaigiparangko ripinganio jolni manderangko dakchakna aro game ge·e cha·enggiparangna dakchakaniko on·na gita ia scheme-ko sorkari a·bachengataha aro ia scheme-ko a·bachengatanichi bang·a songrangon buring bolgrimrangko aro chiring chibisikrangko an·tangtang naljoke rakkina a·bachengataha ine parakataha.
Ganol chibisikko tangatpilna aro ripinge rakkina gita ia PES project-ko a·dokni Chief Minister, 2022 bilsini Apri 2 tariko a·bachengatahachim aro uandaken ia project-na skanggipa bakni cheque-rangkode 2022 bilsini October jaon sualatahachim ine nikna man·a.
Ia PES scheme-na gnigipa bakni cheque-rangko suale on·anganio dongpae bakko ra·anggipa gipin manderangara, West Garo Hills a·jani Deputy Commissioner Jagdish Chelani, SP Abraham T Sangma, 2nd MLP Battalion-ni Commandant Stephen Rynjah, kamoni neng·takanggipa IFS officer Dr S Ashutosh aro MBMA, CLLMP-ni Deputy Project Director James Kharkongor ong·a.
