U·IATTIMGIPAONI
SHILLONG: Mawsynram constituency-ni gitcham MLA aro Bharatiya Janata Party (BJP)-ni dilgipa Himalaya Shangpliang-ko National People’s Party (NPP)-o napna miksongenga ine jangbingbanganirangko knasona man·engon, da·o dipet ua an·tangba iani bidingo NPP-ni dilgiparangna u·iata dongkuja ine Sukrobar salo, NPP-ni state president WR Kharlukhi parakatskaaha.
Adita salrangna skangsan, NPP-ni saksa dilgipa aro a·dokni Deputy Chief Minister Sniawbhalang Dhar-ba, Shangpliang an·tangan NPP-o napna skaniko parakmanaha ine kobor ra·timgiparang parakatahachim.
Shangpliang NPP-o napna skaniko parakahaoba re·baenggipa 2024 bilsini Lok Sabha election-o Shillong parliamentary constituency-oni susana gita tikitko man·gen inede NPP-ni dilgiparang ku·rachakaniko on·skakuja maina Lok Sabha election-o susana gita NPP-ni tikitna susaenggipa manderang bang·en donga ineba Dhar aganahachim.
Indake ong·engon, da·o dipet Shangpliang, NPP-o napna miksongenganiko NPP-ni dilgiparangna u·iata dongkuja aro uamang songbadrangonikosan iako poraisona man·engkua ine NPP-ni state president WR Kharlukhi talataniko on·angskaaha.
Shangpliang, NPP-o napna miksonganiko parakmanaha ine Deputy CM-ni parakatani ja·man, BJP-ni dilgipa aro Cabinet Minister AL Hek-ba iako raken jegalatskaahachim ine nikna man·a.
