UIATTIMGIPAONI
Tura: All India Primary Teachers’ Federation (AIPTF)-ni ong∙atgipa Bharat Yatra-o bakrimpaaniko mesokna All Garo Hills Primary School Teachers’ Association (AGHPSTA) ia anti Sombar-o Garo Hills-ni damdok Sub Divisional School Education Office (SDSEO)ni ning∙o ong∙gipa Association-ni zone ge 12ni primary school teacher-rangoni bang∙bata division-rangon tom∙tome re∙jomaani aro sit-in dharnako ong∙ataha. Bharat Yatra September 5 (National Teacher’s Day)oni October 5 (World Teacher’s Day)ona Indiani ki∙tik brioni ong∙atgen; ia Yatra-o Indiani pilak a∙dokrangon Old Pension Scheme (OPS)ko ra∙gattaipilchina mongsongbate aro gipin dabianirangkoba man∙chape Gujaratni Somnath, Amritsarni Attari border, Assamni Guwahati aro Tamil Naduni Kanyakumarioni re∙ongkate Delhini Talkatora stadium-o gronggrike public meeting-ko salsa ong∙ate matchotatgen.
Pension benefit-ko 1881-o pilak sorkario kam ka∙giparangna Royal Commission on Civil Establishment on∙chengaha ine ma∙sina man∙gen. Indake ong∙genchimoba Atal Behari Vajpayeeni re∙dilanggipa NDA sorkari ia scheme-ko bon∙atna gita 2003-o tik ka∙e 2004 April 1 tarikoni dontongataha. Financial expert-rang aro Reserve Bank of India (RBI) dolgni, OPS-ko on∙angkuode a∙songni tangkako bang∙e jakkalna nangenga, ua tangkarangko a∙songni growth-ko bariatna aro Defence sector-na bang∙bate tangkarangko jakkale a∙songko bilakbatatna man∙gen ine mesoke on∙ani pangchake OPSko dondikate NationL Pension Scheme (NPS)ko ra∙gatskaaha ineba ma∙sina man∙gen. Indake ong∙engon sorkario kam ka∙giparang ia scheme-ko man∙na krachongmota maina kamoni neng∙takkujana kingking donsoa somoi gimik sorkarina dangdike on∙aha ine AIPTF OPS-ko ra∙gattaipilchina sorkariko dabienga. Batanggimin bang∙gija bilsirangna skangba a∙song gimikni primary school teacher-rang Delhini Jantae Mantaro iako sorkario dabie sit-in dharnako ong∙ataha, uno Garo Hillsni bang∙a teacher-rangan bakko ra∙epaaha. Da∙odipet Indiani dambonga a∙dokrango jekai, Chhattisgarh, Rajasthan, Punjab, Himachal Pradesh aro Jharkhand a∙dokrango ra∙gattaipilaha ine ma∙sina man∙gen. Meghalayani skotong songjinma, Shillongoba Khasi aro Jaintia Hillsni primary school teacher-rang AIPTF-ni OPS-ko ra∙gattaipilchina dabie Bharat Yatra-ko ong∙atgipana chakpaani gita re∙jimaaniko apsan salo, September 4 tariko ong∙ataha.