U·IATTIMGIPAONI
SHILLONG: Re·baenggipa Lok Sabha election-rango A·dokni ge·gni Lok Sabha seat-rango susagenma susajawama ba MDA-o bakrimgipa badiaba dolrang baksa bakrime susagenma, da·o dipet A·dok BJP mamingkoba chanchia dongkujaenga.
BJP-ni saksa a·gipi dilgipa Robibaro paraka je, Lok Sabha poll-na party candidate-rangko seokani aroba poll-na maidake kamrangko ka·genchim, uarangni bidingo chanchirimna gita da·o dipetode party-ni gita maming tom·aniko ong·ata dongkuja. Ia pilak kamrangni bidingo BJP-ni ma·mong dilgiparangsa dakdilanggen, da·o dipetode iarangni bidingo mamingkoba agangrikata dongkua ineba party-ni saksa a·gipi dilgipa aganaha.
Indake Ma·mong dilgiparangni ge·etata gitasa state BJP kamrangko ka·anggen ineba party dilgipa aganaha.
Unomitingo party candidate-rangko seokanikode party-ni central election committee-sa dakgen ine State BJP president Ernest Mawrie aganaha. Unigisepon, Parliamentary seat damgnion party-ni kamrangko bilakbate ka·sochinasa da·o dipet state unit-ko u·iataha, Mawrie aganaha.
BJP dilgipa HM Shangpliang-ni doloni ong·kate NPP-ni tikito susana am·enga ingipani bidingo aganengon, koborrango jangana agrede iani gimin da·o dipet maming sakki dongja, Mawrie aganaha. Party, batanggimin somoirangonin Shangpliang baksa golpoanirangko daknade jotton ka·engachim indiba chu·sokgipa ong·jaenga, ua aganaha.
Unaskang, BJP dilgipa aro Cabinet Minister AL Hek indake aganengachim, ua Shangpliang-ko grongaha indiba party-oni ong·katani giminde mamingkoba agana dongja.
Unomitingo, Shangpliang party-oni ong·kate NPP tikito susana chanchienga ine Deputy Chief Minister aro a·gipi NPP dilgipa, Sniawbhalang Dhar ku·watmanahachim.