U·IATTIMGIPAONI
Meghalaya Assembly Committee on Estimates-ko dilenggipa Nongpoh Legislator Mayralborn Syiem-ni gita South West Khasi Hils-ni Mawkyrwat, Sakwang-o Industrial Training Institute (ITI)-ko rika kamrang ong·angengan baksa kam ka·anirangko chu·ongnikangaha.
Institute-ko ta·rake chu·gimik chalaiangna man·a am·enggipani bidingo Estimates Committee-ni chairman, Shri. Mayralborn Syiem, uni kusi ong·aniko parakangaha. Da·o a·palo bijolirangko sale on·ani am aro chi-rangko sale on·anganisan kam dongaia ine ua aganangaha. ITI-ko rikna Labour department-ni ning·o Directorate of Employment and Craftmen Training-na a·a acre 4-ni gita ka·sae on·anganina jeon a·jani chadamberangna namgniko ra·bana ka·dongsoenga ine Shri Syiem, Sakwang-ni Dorbar Shnong-na uni namgipa kamna uko de·mittelataha.
Surface Ornamentation Technique aro Embroidery, Wireman, Office Assistant cum Computer Program, Multimedia-Animation-Special Effect, aro Driver cum Mechanic-ko man·chape ming 5 trade-rango ITI skie on·anggen ine ua talbate aganangaha.
Committee Member aro Mawkyrwat MLA, Shri. Renikton Lyngdoh Tongkhar, a·jaoni chatro chatrirangna skang somoiode uamang poraianiko ra·na gipin a·jarangona songreangna nangachim ine jaksi ote mesokagnaha. ITI-ko a·bachaengatan baksa South West Khasi Hills-oni chatro chatrirang vocational training-ko nambate skie ra·angna man·gnok. Ia institute-ko chu·gimik chalaiangna ta·raken man·anggnok, ine ua kusi ong·aniko parakangaha.
Wenanganio Committee Members Shri. Adelbert Nongrum, Smti. Miani D Shira, Shri. Wailadmiki Shylla, Shri. Arbingstone B Marak, Shri. Damanbait Lamare, Shri. Remington Momin, aro officials of the Meghalaya Legislative Assembly-ni official-rangko chanchapataha.
A·doko donggipa ge-4 a·jarang West Jaintia Hills a·ja, East Jaintia Hills a·ja, East Khasi Hills a·ja aro South West Khasi Hills a·ja gimikona salgnina Estimate Committee-ni bako ITI-ko wene niangaha.
2023 bilsini September 6 tariko, Committee, Sabahmuswang-ni Residential School aro West Jaintia Hills a·jani Lumshnong – Sonapur rama tariako wene niangaha.
Wene niani somoio songtangni MLA Santa Mary Shylla-ni dongpaan baksa Byndihati Residential School rikako nina East Jaintia Hills-ona Committee re·chakatangaha.
Da·alo, East Khasi Hills a·jani Mawphlang-o Science aro Commerce College rikangenggipako Committee niha aro Mawphlang – Balat-ko ramako nipilangaha, South West Khasi Hills-ni Mawkyrwat-ni Sakwang-o rikengipa ITI baksana Lad Mawreng-oni a·bachenge Weiloi-ona niangaha.
