U·IATTIMGIPAONI
Shillong: 2020 bilsio ra·gatgipa NEP-ko a·doko ra·gatna a·dok sorkarini namnikengani bidingo Opposition Congress matnangataha.
“Sorkari ia gitalgipa policy-ko college-rango ra·gatna ge·etenga indiba uko ra·gatna kamrangko mamingkon taria dong-kuja,” Meghalaya Pradesh Congress Committee (MPCC) general secretary, Manuel Badwar aganaha.
Gitalgipa policy-ko ra·gatanio kam ka·gipa manderangko aro gipin gipin namgnirangko nang-gen, ua aganaha.
Infrastructure donggija aro kam ka·na mande-rangko nangani gimin a·dok sorkari agangrika dongja, ua aganaha.
“Daitoko ra·na sorkariko taria dongja gita nikaia. College-rang ua nangani-rangko chu·sokatna sorkarini dakchakaniko nanggen. Indiba ua minggni kamrangni gimin sorkarioniko maming agangrikanirangko man·ja,” MPCC general secretary aganaha.
Indake ong·engon, MCTA aro NEHU-ni gisepo da·o ong·enggipa meligrik-grijani bidingo a·dok sorkari agane on·chenggija iako ra·gatdrana on·enga, Badwar aganaha.
Jegalenggipa college-ni skigiparang aroba principal-rang baksa uamangni neng·nikanirangko ma·si-chakan baksa chanchi-grikna sorkarini kam ong·e chanchigrikna ka·dong-enga, ua aganaha.
“UG course-rangni skanggipa semester-ni chatro-chatrirangna jean namen neng·nikani ong·-batenga uko chanchigija a·dok sorkari ra·gatna on·enga, ian namen dukni ong·a,” MPCC general secretary aganaha.
Ia policy-ko ra·gatachi a·palnirangchi mittelako man·a jotton ka·ani NPP-chi dilenggipa MDA sorkarini skanggipa dakgni ong·a indiba namen gualani ong·a.
“NEP-ko ra·gatanio college-rangna dakchakna sorkari tangka-paisarangko on·atna nanga indiba tangka-paisa on·atanide namen chel·a,” ua aganaha.
Policy-ko ra·gatna skang sorkari namedake tarisamsoani dongna nanga aro kragipa bewalo policy-ko ra·gatna man·aba donga, MPCC general secretary aganaha.
Indake ong·engon NEHU vice chancellor, Prof Prabha Shankar Shukla-ni gimin ua mamingkon aganjaenga maina ua Delhi-ni niamrangkosan ja·rikaia.
‘Indiba mikkangchi poraigipa chatro-chatrirangni namgnina uko ning·tue chanchie sorkari kamko ka·anggen chinga ka·dongenga. Sorkari daitoko university-ona watatna jotton ka·enga. Basako ia da·o ong·-enggipa obosta matchot-gen darangba ma·sija,” MPCC general agandapaha.
Indake ong·engon, NEHUSU, National Education Policy-ni ja·pang katta, ‘National Education Policy 2020: fundamental right to education-ko pe·galani ong·enggipa uni bidingo da·alo Lakeside, NEHU campus-o chanchigrikgen.
NEHU-ni niksenggipa Scholar-rang, Prof H.Srikanth of Political Science department, Prof Prasenjit Biswas philosophy department-ni, Prof. Xaviers Mao, Philosophy Department-ni aro Prof S.Pradhan Commerce department St.Anthony’s College-ni chanchianio dongpagen. Ua tom·ao Mawlai-ni MLA, Brightstarwell Marbaniang dongpagen.