U·IATTIMGIPAONI
TURA: West Garo Hills-ni Asikandi songo sak gittam dingtang dingtang manderangni a·arangko Idris Ali minggipa mandena a·a pattako niam gri on·ani bidingo GHADC-ni Land Records Branch-o kam ka·enggipa Lot Mondol saksani kosako FIR ka·aha.
A·a nokgiparangoni saksa Nurul Islam, Phulbari Police station-o GHADC-o kam ka·gipa Rashirdur Islam-ni kosako badi ka·aha. Sakgipin sakgni a·a nokgiparang Aziar Rahman aro Asma Bibi sakgnian Phulbari PS ning·ogipa Asikandi songoni ong·a.
Islam-ni aganani gita uni aro sakgni gipinrangni a·arangko Rashirdur Islam, Idris Ali-ni bidingo niam gri a·a patta dake on·aha. Niam gri a·a patta tarie on·gipa lekkao March 1982-o Bengali ku·sikchi segipa sale deed-o tol·e soi ka·aha.
FIR ka·ao, sale deed maina kakketgipa ong·jaha bang·a a·selrangko Islam janapaha.
“Sale deed chongmote Mozial Hoque Master-ni segipasa ong·na nangachim. Maibakai, uni depante-Baharul Ulam Sarkar, ru·utgija salo ong·atgipa panchayat meeting-o uni pagipani soiming uni soiming sale deed-o soi ka·gipa apsan ong·ja ine jeaha. Minggipin kam sale deed A4 size lekkao seaha jekon 1982 bilsio man·jachim,” Islam aganaha.
Islam aroba jaksi ote aganaha uni voter ID-ni gita Idris Ali jean uni pagipaoniko a·ako breaha ine aganengachim 1982 bilsio bilsi 13-san ong·enga unomitingo ua chonenga aro damsakoba brena cholikujachim. Serikanirangko nikani gita uni pagipa 1986-o agangipa a·asan dongaia aro bilsibrina skang 1982 bilsio Idris Ali-na maikai a·ako palna man·aha, Islam sing·doaha.
Aiao inmanpilani Phulbari aro Bhaitbari a·jolrango songdonggipa manderang skangode Rashidur Islam-ko Lot Modol ong·e a·jolo kam apjitaniko ua uni togina-cha·bokna sapanichi niam gri kamrangko ka·anina ua mingsingako man·pilgipa mandesa ong·a ine matnangtokaha. Badi ka·ani lekkako GHADC Deputy CEM, Nikman Ch Marak-na on·aha.
