Tura: Garo Hills-o ge·sa gitchambatsranggipa institiute, Durama College, 30-gipa Foundation Day-ko dal·bee maniangaha, jeon Meghalaya Assembly-ni Speaker Thomas A Sangma baksanaba Education Minister Rakkam A Sangma maniani dongpaaha.
Meghalaya a·dokni Chief Minister Conrad Sangma jean da·o New Delhi-o ong·enggipa G-20 Summit tom·anio dongpaenga, program-na mongsonggipa sokgipani biap bangbang ong·e dongaiaha. Achik Literary Society-ni membor-rang baksana program-ni bako a·jani gimikoni academy-ni dilgipa membor-rang aro bang·a chatro chatrirang dongpatokaha.
College-ni gita kan·dik-gipa kattarangko aganang-na skang college-ni principal K N Sangma-chi pilak chugipa gadango dilgipa-rangko rimchaksoaniko kattachi salko a·bachengat-aha, Durama college, Tura songjinmaoni km 3-ni gita Rongkhon-o donggipa Megongre songo da·ode permanent compound-ko man·aha.
“Da·o dipet songreani-rang bilongen namgipa ong·baaha indiba jemangan pora skianiko man·a sikenggiparangna cholko aro college-ni gam-chataniko u·iate on·angna didianiko an·ching dakang-kuna nangenga. An·ching chasong gitalko a·kangna man·gen jeon ia bilsi 30-o ia college dingtang ding-tang a·barango uamangni chinrangko ba mingani-rangko on·aha,’ ine principal aganaha.
Sorkarini gita 75% dormaha baksa college dakchakaniko man·enga aro gipin nanggiparang-kode institution-ni gita niroke kam ka·angenga.
“College post-rangni ge-14 baksa chingo chama-gipa sak 16 skigiparang donga. NEP 2020-ni ning·o nangchongmotanio additional faculty position-rangko ia somoion nangenga. ‘People’s College’ dake chingko parakatchina CM, Education Minister aro Speaker-ko chinga mol·mola, jedakode an·chingni chalaianio tangka paisani gita biljrimaniko olgrokatgen.
Durama ge·sangipa stream college ong·a, NEP-ni gita curriculum-na gipin stream-rangko on·dap-anganio uamang nichak-soenga ine principal aganangaha.
College-ni itihas-ko gisik ra·atpilengon, college-ni namgipa a·bachenggipa kamrangko faculty membor Rupabel A Sangma aganangaha, jekon Government Girls College aro Garo Graduate Union-ni biaponi college-ko chalaina jakkalangaha.
“Skango pringni somoiosan college-ko ka·anga aro ching baksa pangnan bang·a mande-rang college-o napgiparang donga. Chinga gisik ra·a jemangan a·bachengatgipa pagiparangko jean uamangni somoirangko aro iako ong·atna college-na chol ramako ong·katatna jotton ka·anio re·ataha jekon da·o an·ching da·alo nikenga. Chinga DC Jatirbinder Singh-koba gisik ra·enga jean pring antion pringni class-rangko ra·na re·baaha. Ua R. Bhattacharya aro LD Shira-ni gita bakrimaha uamang sakgnian Tura Government College-ni principal-rang ong·achim,” ine Rupabel aganangaha.
Giribala G Momin, IK Sangma, Fraidina K Marak-ni on·gilanganirangkoba ua agandapangaha.
1995 bilsio skanggipa pre university batch 1997 bilsio skanggipa chatro chatrirang graduate ong·chengaha. Megongre songni Chambugong mahari-ni gita a·ako ka·saa on·ako man·ani ja·man college-ko 2009 bilsio da·o dongengigpa campus-ona jitbaaha. Ka·sae on·gipa a·a chu·gimik bigha 72 aro katta 1 donga.
English faculty membor C Bose-ni gita Speaker-na aro Education Minister-na People’s College bimingko college-na on·ako nangnike dorgasto see on·aha.
Manianio bak ra·na uko okamatanina college-ni faculty-ko Rakkam Sangma mittelangaha. ‘People’s College’ bimingko on·angani bidingo gisiko nange ra·angna nangani ong·enga aro iani bidingo uamang CM baksa agangrikang-enga ine ua manianiona jinma tom·chimonggipa-rangna aganangaha.
“Chinga iani bidingo agangrikaha aro iako gisiko nangbate ra·angna nangenga. Da·alona college nambegipa kamrangko dakaha aro indakgipa kamrangko mikkangchiba tangangkuna chinga ka·dongsoenga. NEP-na re·chakatanio bang·a
(Mitam jak 2-o)
dingtanganirang dongnaba donga aro iano gisiko nangbatangenga,” ine Rakkam aganangaha.
“Bilsian sak 16,000-ni gita chatro chatrirang graduate ong·enga aro ian sorkarina bang·a kamrangko ong·katatna bilni nalsao ong·enga. Avenue ge·antiona niatna nanga. Chinga uarangona dakchakaniko on·anggen,” ine ua agandapangaha.
Program-ona songtangni MLA Thomas Sangma baksa Rakkam Sangma mongsonggipa sokgiparang ong·e bakko ra·angaha.
CM-ni sokbana man·gijani uni palo kema bia, ine Thomas aganangaha, ‘People’s College-ni bidingo Durama-na niatna nangchongmotgipa ong·enga ine ua agandapangaha.
“Uamangni iani bidingo gisik nangatja ong·ode, angni constituency-oni manderangni bak ra·annio anga iako ra·doanggen. Anga ka·donga ianoni maiba ong·katgen,” ine Thomas aganangaha.
Ua college-na on·gilanggipa pagiparangko gisik ra·e aganangaha aro Garo Hills-ni pilak section-rangna nambatgipa education-ko on·angani kamrangko aganangaha.