U·IATTIMGIPAONI
SHILLONG: A·dokni manderang load shedding ba bijoli den·ako chagrongna nangkuenga, batanggimin adita jarangonin a·doko iandakgipa obostako nikna man·enga, da·ode Umiam reservoir-oba chi gapahachim indiba obosta apsankuenga.
Ia bilsini March, April jao sorkari, bijolio neng·nikako man·ani gimin load shedding ka·aha, indiba mikka waanichi chu·onga gita chiko man·genchimoba da·onan a·dokni manderang salprako konta 2 bijoli den·ako chagrongenga, songo donggiparangde ru·uta somoina load shedding-ko chagrongna nanga.
June jaonin Umiam-ni chi level bariahachim indiba manderang bijoli den·ako man·kuenga.
Neng·nikan somoio MeECL, mitam generating company-rangoniko bijoli brena nangaha ine sorkari agana, indiba da·ode obosta namahani gimin MeECL, ra·srogipa company-rangna on·pilskaenga, ia on·pilani kam March jaon matchotanichim ine sorkari aganaha.
Salantian wal 12 bajioni bijoliko den·kuenga unbaksanaba salon adita changna bijoli sikuenga.
Sorkaride, salo bijoli sianiko local ba jolo neng·nikani giminsa ong·enga ine aganaha indake ong·ode maini gimin salantian bijoli siskaenga ine jolni manderang sing·doskaha.
