U·IATTIMGIPAONI
TURA: Dadenggre, Gasbari Non-Government LP School-o niamgri teacher ba skigipako rakkiani bidingko nipiltaichina aro bangbang ong·gipa post-na advertisement-ko on·taichina Director of School Education and Literacy (DSEL) Shillong, ge·etahaomangba ia mamlao maming ja·kukon de·kujaenga. Niamgri kamo rakkigipa skigipaan school-ona re·e class ra·kuenga.
Garo Hills Youth Organisation (GHYO)-ni President aro Advocate Nazmul Hashan, Karimul Islam-ko, school-o niamgri skigipako rakkiani gimin badi ka·aha. Uamangni badi ka·ani ja·man DSEL, ‘Top Most Urgent’ ine order-ko on·aha aro Swapnel Tembe, July 19 tariko, SDSEO-ko school-ni SMC-ko bangbang ong·gipa post-na advertise on·ne MTET qualified candidate-ko kamo rakichina ge·etaha.
Indiomangba niamgri kamo rakkigipa Karimul Islam, da·onan school re·bakuenga aro class ra·enga ine Hashan, Sombar salo aganaha.
“Karimul Islam, da·onba school-ona re·angkue class ra·kuenga, sawa uko school-o skina cholko on·kuenga. Head Master Shohidur Rohman ma gipin authority-na cholko on·kuengama? Islam-ko niamgri kamo rakkiaha. Head Teacher ba Authorities ba School Managing Committee (SMC) ba Cluster Resource Person (CRC), iarangoni sako niam pe·anina rim·gen? ine Hashan, sing·ataha.
