U·IATTIMGIPAONI
SHILLONG: Ma·mongo BJP-chi dilenggipa NDA sorkarini ra·gatna miksongenggipa ‘One Election One Nation’-ko Mongolbar salo Shillong-ni Lok Sabha MP Vincent H Pala jegalatenba, ian dal·dalgipa political dolrangnasan namgni ong·aigen indiba chonchongipa dolrangnade namen neng·ani ong·gen ine parakataha.
A·song gimikna election-ko ge·san dake ong·ataniara maming gital katta ong·ja indiba da·ororo a·songo ong·enga obostao pangchake iako ra·gataniara namen neng·beani ong·gen ineba Pala parakataha.
‘One Election One Nation’-ara chonchongipa political dolrangnade gimaani ong·gen ine janapatengon, ian chonchongipa dolrangnade tangna gita neng·ani ong·gen indiba dal·dalgipa dolrangsa namgnirangko man·skaaigen ine Pala parakataha.
Public Grievances Committee-ni mitam membor-rang ‘One Election One Nation’-na chakpaaniko on·engoba iana Congress dolde maming dakeba chakpaaniko on·jaenga ineba Meghalaya Pradesh Congress Committee (MPCC)-ni president parakataha.
A·songko ‘Bharat’ ine mingskana miksongenggipani bidingo janapatskaengon, ian a·songo tangka paisani gita neng·nikanirangko chagrongna nangengani gimin a·songni Prime Minister aro BJP-ni dakdrana jotton ka·aniko mesokanisa ong·enga ine Pala parakataha.
‘India’ bimingkon indita ru·utbea bilsirangna jakkalbaaha ine janapatengon, a·songko ‘Bharat’ ine mingskana jotton ka·aniara, UP aro Bihar gita dakgipa jolrangko namnikatna jotton ka·anisa ong·engakon ine Pala parakataha.
“Re·baenggipa 2024 bilsini Lok Sabha election-o an·tangtangna rama tarina gitasa BJP iako ra·bana jotton ka·engoba, a·songni bimingko dingtangataniara altua kam ong·jawa,” ine Pala aganaha.
