U·IATTIMGIPAONI
SHILLONG: Meghalaya Legislative Assembly-ni Autumn Session-ko da·al September 15 tarikoni a·bachengatengahaon, ia session-ko ong·atanio, a·dokni Opposition Congress dol, ma·mong sorkarini ra·gatna miksongenggipa Uniform Civil Code (UCC)-ni bidingo a·dok sorkariko sing·doangna gita sienga.
Opposition dolni dilgipa Ronnie V Lyngdoh-ni parakatani gitade, ia Autumn Session-na donsogimin salrang namen bakkandikbeaha aro salbongani gisepode uamang a·dokni dingtang dingtang nanganirangko chanchirimna gita man·srapjawa.
“Indake ong·genchimoba, ia Autumn Session-ni somoio chinga UCC-ko jegalna gita resolution-ko ra·bagen. Chingni resolution-ko sorkari ra·chakama ra·chakja uade uamangni jakosa ong·aia,” ine Lyngdoh aganaha.
UCC-na agreba ia Autumn Session-o Opposition dolrang, National Education Policy (NEP) 2020, chirang chu·ongjaengani gimin, namgipa an·seng baljokanirangko man·jaengani gimin aro uandakgipa dingtang dingtang kamrangni giminba sorkariko sing·doanggen ine Lyngdoh parakataha.
Autumn Session-na calendar-ko tarisoani gitade, ia Autumn Session-ni salgittamko government business-na aro salgniko private membor-rangni kamna jakkalangna siengachim.
Autumn Session-ni skanggipa salo, Assembly-ni Speaker, Business Advisory Committee-ni report-ko jinmana parakatgen aro uni ja·man sorkari, dingtang dingtang bill-rang, ordinance-rang, order-rang aro dingtang dingtang u·iatna nanganirangko jinmana u·iatanggen.
Autumn Session-ni gnigipa aro brigipa salrang, chong·motan September-ni 19 aro 21 tarikrango private membor-rangni business-rangko private membor-rangni bill-rag, motion-rang aro resolution-rang gita jako ra·angskagen.
September-ni 20 tariko, grant-rangna Supplementary demand-rangko Assembly vote ka·anggen aro uandaken September-ni 22 tariko Meghalaya Assembly, Meghalaya Appropriation (No. III) Bill 2023 aro gipin sorkari Bill-rangko pass ka·anggen.