U·IATTIMGIPAONI
TURA: National Nutrition Month-ko maniani bak gita re·anggipa Budbar salo, Central Agricultural University (CAU)-ni ning·o donggipa Tura-ni Community Science College-o food festival-ko college-ni Food Science & Nutrition department ong·atangaha.
Ia food festival-ko ong·atanio, samba jolrango bading chiwalgiparang, college-ni gitcham chatrirang aro da·o poraienggipa chatrirangba bakko ra·e, kraa damrango ma·manti cha·ani aro ringanirangko manderangna palangtokaha.
Ia food festival-ko ong·atanio NEHU, ICFAI aro uandakgipa dingtang dingtang institute-rangoniba chatro chatrirang re·bae bakko ra·angtokaha aro ia biapo palgipa cha·anirangko cha·e nina cholrangko man·tokaha.
Ia food festival-ko Tura-ni DMCH Officer Dr Ivonne M Sangma, do·ga oe on·angaha aro ia festival-ko do·ga oe on·anganio ua jinmana aganprakangengon, ma·manti sabisi sakanchirangoni chel·e dongna gita namgipa cha·anirangko cha·china aro be·entangko ranta ka·jringchina gita program-o bak ra·gipa mande sakantikon didiangaha.
Ia festival-ko ong·atanio Community Science College-ni Assistant Professor Dr Natasha R Marak-ba jinmana aganprakengon, ia sal somoirango namgipa cha·anirangko cha·na nangengani gimin manderangna dingtangmancha u·iatanirangko on·na nangenga ine parakataha.
Ia skangba, Commnunity Science College-ni gita Tura Super Market-o mini exhibition-koba ong·atangaha.