U·IATTIMGIPAONI
TURA: Civic Action Program-ni bak gita Sukrobar salo, 43 Battalion BSF dolni sipairang, South Garo Hills a·jani Cherangre Border Outpost (BOP)-o free medical camp-ko ong·atangaha.
Ia medical camp-ko ong·atanio BSF aro sorkarini doctor-rang, manderangna indin porikkarangko ra·e nian baksana songni nokni manderangna samrangkoba indin suale on·angaha.
Ia medical camp baksana BSF Sector Hq Shillong-ni DIG Tarni Kumar Tiu aro 43 Bn BSF-ni Commanding Officer Ratikant Thakur-ni dilanichi, BSF official-rang, ma·manti bosturang, jekai solar light, chatta, plastic chair, table, kal·susaani bosturang aro uandakgipa bosturangko, Rongara, Cherangre, Seemakona aro Dambuk Apal songni chatro chatrirangna aro songni manderangna suale on·angjolaha.
Ia program-ko ong·atanio dingtang dingtang songrangoni bang·bea manderang re·bae bakko ra·angtokaha.
