U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-o sako Shillong parliamentary seat-o NPP-ni candidate ong·e susaatna sienga, mamingkoba parakatjahaoba candidate-rangko seokna gita kamrangko a·bachengengaha ine Sukrobar salo, a·dokni Chief Minister aro National People’s Party (NPP)-ni national president Conrad K Sangma parakatskaaha.
BJP-ko wate adita salrangna skang NPP-o napanggipa Mawsynram-ni gitcham MLA HM Shangpliang-na NPP-ni tikitko on·naba gnang ine bang·bata manderangan chanchichiptokengoba da·o dipet NPP-ni tikitko una on·ani giminba NPP-ni national president, maming ku·rachakanirangko on·skajaha.
“Lok Sabha election-na candidate-rangko seokna gita chinga chingni dakrongbewal gita kamrangko a·bachengmanaha aro bang·a candidate-rangan NPP-ni tikitna dorgastorangko galtokengani gimin chinga party-ni gita candidate-rangko name nina a·bachengengaha,” ine Sangma aganenba, candidate-rangko seokengon, cheani cholrang dongama dongja, ukoba niesa seokgen ine parakataha.
MDA-o bakrimenggipa dolrangni gisepo apsan candidate-ko susaatani bidingo sing·on, MDA-o bakrimenggipa pilak political dolrangan an·tangtangni dolko dal·roroatna gita party-tangtangni candidate-rangkosa nangniktokenga ine Chief Minister aro NPP-ni national president parakataha.
“Pilak political dolrangan an·tangtangni party-ko dal·roroatna nangniktokengani giminsa an·tangtangni candidate-rangko nangnikenga, uni gimin iano maming gualani dongja,” ine ua aganaha.
Shangpliang-na NPP-ni tikitko on·ani cholrang dongama ine sing·anina aganchakaniko on·angskaengon, NPP-o napna skangan membor-rang pilakkon maming niamrang dongna man·jawa indiba party tikitna dorgasto galna sikode galna man·aigen ine aganchengronga ine NPP-ni national president parakataha.
Tura Lok Sabha seat-ni gimin sing·on, Tura Lok Sabha seat-naba apsan niamrangkon ja·rikenga aro candidate-ko seokna gita screening committee donga ine Sangma parakataha.
“Oe beben membor ong·soenggipa candidate-nade dingtang niamrang donga indiba tikitko on·aniode chu·gimik kamrangko ka·enggipa committee donga,” ine ua aganaha.
Tura parliament seat-o James Sangma-ba susaani cholrang dongama ine sing·skaon, tikitnade jeba dorgastoko galna man·aigen aro pilaknan niamrangde apsan ong·aigen ine NPP-ni national president parakataha.
