U·IATTIMGIPAONI SHILLONG: Meghalaya Residents Safety & Security (MRSS) Act-ni bidingo ma·mong sorkarini aganchakaniko a·dok sorkari man·soaha ine Sukrobar salo, a·dokni Chief Minister Conrad K Sangma parakataha. Iani bidingo kobor ra·timgipa manderang baksa agangrikengon, MRSS Act-ni bidingo ma·mong sorkarini aganchakaniko man·soahani gimin da·o maikai ia niamko jako ra·anggen, uko a·dok sorkari niengkua ine Chief Minister parakataha. Meghalaya a·doko niam gri napsrukanirangko champengna gita MRSSA 2016-ko ra·gatningna man·jaengani gimin Khasi Students Union (KSU) aro dingtang dingtang dolrang, a·dok sorkariko matnangtokengachim ine nikna man·a. Inner Line Permit (ILP)-ko ra·gatchina dabienggipani bidingo janapatskaengon, ian da·o dipet ma·mong sorkarini jakosa ong·kuenga ine Chief Minister parakataha. ILP-ko ra·gatanide manderangni mongsonggipa jajrengani ong·ja indiba niam gri napsrukanirangko champenganisa manderangni jajrenganide ong·batenga ineba ua aganaha.
