U·IATTIMGIPAONI
SHILLONG: Shillong songjinmao traffic ba rama block ong·ako namatna darangba jotton ka·jaenga ine United Democratic Party (UDP) general secretary, Jemino Mawthoh aganaha.
“Shillong songjinmao traffic-na neng·nikako darangba name dake nirokjaenga. Salantion manderang traffic-ni gimin neng·nikako agantoka, manderang somoi gita kamona sokna man·tokja, an·tangtangni gamchatgipa somoiko traffic-o bon·atna gita nanga, ine Mawthoh aganaha.
Adita bilsirangonin traffic-ko namatna dingtang dingtang kattarangko aganbaenga indiba da·onan maming ja·ku de·aniko nikkuja. Shillong songjinmao traffic-na neng·nikako namatna apsan ong·e namgipa plan-ko ra·bana nanggen.
Darangba ia mamlalko namatna jotton ka·jaenga, traffic police-rang jemangan traffic-ko salantian nirokenga, uamangnasa ka·sachake nikpila. Kragipa plan-ko ra·baja ong·ode, mikkangchi obosta nambatjawa ine Mawthoh aganaha.
Ia bilsini April jao Meghalaya High Court, songjinmao traffic-ko nirokna gita a·dok sorkariko agan-ku·pattiahachim aro maidakgipa ja·kuko de·enga, iani gimin affidavit ka·china sorkariko ge·etahachim.
Adita salrang skangsan Chief Minister Conrad K Sangma, Intergrated Command Centre (ICC) for Shillong-ko Smart City Project-ni gita ra·gatgen, jean Shillong-ni chu·gimik security aro traffic arrangement-ko nirokgen ine koborna u·iataha.
“Songjinmao ge 300 CCTV-rangko dongen, ine CM aganaha.
