U·IATTIMGIPAONI
WILLIAMNAGAR: Garo Students Union (GSU) Eastern Zone Williamnagar-ni gital dilgiparangko seokna gita election-ko ta·raken ong·atchina mitam membor-rang dabitokengon, da·o dipet ia election-ko ong·atna gita somoirango melikujaenga aro somoirango meliahaon, GSU Eastern Zone-ni ning·o donggipa regional unit-rang aro central executive committee (CEC)-ni dilgiparang baksa chanchirime election-ko ong·atanggen ine GSU Eastern Zone-ni dilgiparang talataniko on·ataha.
GSU-EZ Williamnagar-ko dilna seoka man·gipa manderangna dongimin term ba somoi ia bilsini September jaon bon·engaha ine adita salrangna skangsan, GSU-EZ-ni mitam membor-rang parakatenba, GSU-EZ-ni gital dilgiparangko seokna gita ia September jani gisepon election-ko ong·atchina GSU Central Executive Committee (CEC)-na sedoatahachim ine nikna man·a.
Indake ong·engon, ia September jani gisepon GSU Nengkra unit-ni election-koba ong·atengani gimin aro September-ni 30 tarikon skigiparangna aro chatro chatrirangna seminar-ko ong·atan baksana re·baenggipa October jani 10 ba 12 tarikrangon SSLC selection test-koba ong·atengani gimin somoirang apchangket ong·e da·o dipet GSU-EZ-ni election-ko ong·atna man·kujaenga ine GSU EZ-ni dilgiparang parakatskaaha.
“GSU-Eastern Zone-ko regional unit-rangsa seokengani gimin pilak regional unit-rang baksa agangrikchenggijade zonal body-ko bon·atna man·jawa. Election-ko ong·atna gita somoirangba jakkena nangao ga·aka aro election-ko ong·atna skang, dingtang dingtang regional unit-rang aro CEC-ni dilgiparang baksa chanchirimchengesa election-ko ong·atanggen,” ine GSU-EZ-ni dilgiparang parakataha.