U·IATTIMGIPAONI
TURA: HIV/AIDS-ni bidingo chadamberangna mikrakataniko on·na gita re·anggipa September-ni 18 aro 19 tarikrango Tura-ni Don Bosco College, Meghalaya AIDS Control Society (MACS) baksa nangrime Red Ribbon Youth Festival-ko salgnina Don Bosco College of Teacher Education Hall-o ong·atangaha aro ia youth festival-ko ong·atanio dingtang dingtang college-rangoni chatro chatrirang bakko ra·angtokaha.
Ia Red Ribbon Youth Festival-o dingtang dingtang susaanirang, jekai Marathon, Quiz, Drama, Folk Singing, Speech aro uandakgipa susaanirangko chatro chatrirangna ong·atangaha aro ia susaanirango chegipa chatro chatrirang da·o, September-ni 22 tariko Shillong songjinmao ong·atenggipa state level competition-rango bak ra·angskagnok.
Ia youth festival-ko a·bachengatanio Tura Civil Hospital-ni Senior Specialist aro ART Centre-ni Nodal Officer Dr Rajamoni R Marak, mongsonggipa sokgipa ong·e, chatro chatrirangna aganprakangengon, HIV/AIDS sabisini bidingo chadamberangna mikrakatanirangko on·na nangengani gimin aganangaha.
Ia festival-ko matchotatani salo, Tura Don Bosco College of Teacher Education-ni Principal Rev Dr Pius Varghese, mongsonggipa sokgipa ong·e bakko ra·angskaenba, dingtang dingtang susaanirango chegipa chatro chatrirangna trophy-rangko aro certificate-rangko suale on·angskaaha.
Ia youth festival-ko ong·atanio Shillong MACS-o donggipa IEC-ni Deputy Director Ajoy M Lanong aro gipin official-rangba, HIV/AIDS sabisini bidingo chatro chatrirangna agan-talatanirangko on·angaha.