U·IATTIMGIPAONI
SHILLONG: Meghalaya a·dokni North Eastern Indira Gandhi Regional Institute of Health & Medical Sciences (NEIGRIHMS)-koba AIIMS gita dakgipa institute-ni gadangona ra·doatna gita ma·mong sorkariko didichina gita Meghalaya Assembly-ni Opposition dolrangko dilgipa Ronnie V Lyngdoh, a·dok sorkario dabiangaha.
Lyngdoh-ni parakatani gitade, NEIGRIHMS-o endocrinology, dialysis unit baksa Nephrology, gastroenterology, organ transplant, plastic surgery burns unit, pediatric surgery, medical oncology aro nuclear science gita dakgipa department-rang dongkujaenga aro indiba Karnataka, Kerala, Goa, Sikkim, Tripura, Mizoram aro Manipur a·dokrangde AIIMS gita dakgipa institute-rangko kulichina ma·mong sorkariko mol·molmanahachim.
“Angni sing·anide, ia gipin a·dokrang ma·mong sorkarina sedoatna man·ahaode maini gimin Meghalaya sorkari, NEIGRIHMS-ko AIIMS gita dakgipa institute-ona ra·doatna gita ma·mong sorkariko mol·molatjaenga?” ine Mylliem-ni Congress MLA Ronnie Lyngdoh aganaha.
Nambata cholrangko man·engani gimin NEIGRIHMS-ni bang·a doctor-rangan da·o Guwahati songjinmao donggipa AIIMS-ona re·angskaaha ineba Lyngdoh parakataha.
NEIGRIHMS-o pilak nanga cholrang aro a·arangba dongani gimin AIIMS gita dakgipa institute ong·atna ma·mong sorkari bang·e koros ka·na nangjawachim ineba ua aganaha.
Lyngdoh-ni sing·anirangna aganchakaniko on·angskaengon, AIIMS-ni gadangna dingtangmancha USP donga aro Meghalaya a·doko AIIMS gita dakgipa institute donggenchimode a·doko state-of-the-art treatment dongna man·gnokchim ine a·dokni Health Minister Ampareen Lyngdoh parakataha.
Indake ong·genchimoba, NEIGRIHMS-ara autonomous institute gita register ka·gimin ong·ani gimin bang·en cholrang donga aro ia hospital-ko da·o dal·batatna gita a·bachengaha ine Health Minister, talataniko on·angaha.
“Chinga Union Health Minister baksa agangrikmanaha aro iani bidingo agangriktaigen. Meghalaya a·doko AIIMS gita dakgipa institute-ko kulina man·genchimode ian a·dokni manderangna namen namgni ong·gen,” ine Lyngdoh aganaha.