U·IATTIMGIPAONI
RESUBELPARA: Budbar salo, North Garo Hills a·jaoba SSA District Mission Coordinator Office-ni gita World Literacy Day-ko Mendipathar Multipurpose Society Hall-o manidilangaha aro ia salko manianio GHADC-o nominate ka·ako man·gipa MDC Aldo A Sangma, mongsonggipa sokgipa ong·e bakko ra·angaha.
Ia program-ko ong·atanio Aldo A Sangma, jinmana aganprakangengon, mandenasan ong·aigija songsalni namroro silroroanina a·gilsakni seng·aniko nangchongmotani gimin aganangaha.
Lekka poranian bi·sani jumangrangko chu·sokatgipa ong·ani gimin bi·sa sakantian lekka poraniko man·na nanga ineba ua aganaha.
Ia World Literacy Day-ko manianiara lekka porao darangkoba watchanggaljana gita an·chingko gital dake gisik ra·atpilani ong·enga ineba Sangma aganaha.
Ia salko manianio North Garo Hills a·jani Additional Deputy Commissioner Nippon Hajong-ba dongpae jinmana aganprakangengon, bi·sarangko poraichina didina gita sorkarini ra·gatgipa dingtang dingtang education scheme-rangni bidingo talate on·angaha.
Skulrango poraia dontonggipa bi·sarangni gimin janapangengon, skulrango poraia dontonganirangko champengna gita pilakni bakrimaniko nangchongmotenga ine ADC parakataha.
Ia program-ko ong·atanio Resubelpara Block, Bajengdoba Block aro Kharkutta Block-ni ning·o nambate kamrangko ka·enggipa Cluster Resource Centre-rangna award-rangkoba on·angjolaha.