U·IATTIMGIPAONI
SHILLONG: Assam a·dokni Karbi Anglong a·jao United People’s Front of Karbi Longri (IPFKL) bobil dolko bikotaha ine songbadrango seahani gimin a·dok damgnini simarango songdongenggipa manderangna naljokaniko on·na gita Meghalaya sorkari, sima jolrango chel·chakgipa sipai dolrangko bariataha ine Bristibar salo, a·dokni Chief Minister Conrad K Sangma parakataha.
Autumn Session-o Mowkaiaw-ni UDP MLA Nujorki Sungoh-ni sing·anirangna aganchakaniko on·angengon, sima jolrango songdongenggipa manderang, gital bobil dolni tangka dabie seatgipa chittirangko man·soaha ine koborrangko man·soengoba da·o dipet ian kakket ong·a ine darangonikoba sakkirangkode man·soa dongkuja indiba songbadrango seanirango pangchake, ia jolrango songdongenggipa manderangna naljokaniko on·na gita Meghalaya sorkari, chel·chakgipa sipai dolrangko baridapataha ine Chief Minister parakataha.
“A·dok damgnini sima jolrango gital bobil dake chakatgipa dolni bidingo songbadrango seanio pangchake chinga chel·chakgipa sipai dolrangko baridapataha,” ine ua aganaha.
Iani bidingo Jaintia Students Movement (JSM)-ni sedoatgipa chittikoba sorkari man·soahani gimin nanga gita ja·kurangko de·aha ine janapatengon, a·dok damgnini simarango tom·tomaniko rakkina gita sorkari, police aro district administration-rangba rakbee kamrangko ka·enga ine Chief Minister parakataha.
Mowkaiaw MLA-ni janapgipa kattarangara namen nangchongmotgiparang ong·a ine janapatengon, Block I aro Block II jolrango nambate nirok sandina man·na gitasa ia biaprangko transfer ka·aha aro iani bidingo Meghalaya sorkari, Assam sorkari aro India sorkarioba nanga gitan report-rang donga ine Sangma aganaha.
“Ia pilakko nigopesa chinga Assam sorkari aro Karbi Anglong Autonomous Council (KAAC) baksa agangrikanirangko dakna a·bachengaha. A·dok damgnini simarang ong·enggipa golmalrangko namatna gita skanggipa changna Assam aro Meghalaya sorkarirang ja·kurangko de·chakataha,” ine ua aganaha.
Assam aro Meghalaya a·dokni dilgiparang, October jani skanggipa antio ong·jaode gnigipa antio gronge agangriktaina sienga ine janapatengon, Khanduli, Psiar, Block I aro Block II jolrango obostarang namjabatengani gimin ia jolrangni bidingo a·dok damgni gisik on·bate chanchirimanggen ine Chief Minister parakataha.
Mowkaiaw MLA-ni mol·molani gita, Khatkhasla aro Mojem jolrango ramarangko tarina gita ua deputy chief minister baksa agangrikmanaha aro iana detailed project report (DPR)-ko tariengaha ineba Chief Minister parakataha.
Iana skang, Mowkaiaw-ni UDP MLA Nujorki Sungoh, sima jolrango ong·enggipa obostarangni gimin chanchirimaniko dakdilangengon, Assam a·dokni Karbi Anglong a·jao gital bobil dolko bikotahani a·sel West Jaintia Hills aro West Karbi Anglong-ni sima jolo donggipa Block-I jolrango Khasi-Pnar manderang kenchipchipe dongna nangtokenga ine an·tangni suk ong·gijaniko parakatahachim.
