U·IATTIMGIPAONI
TURA: Garo Hills-ni primary skulrango kamrang olgrokenganichi skulrango poraienggipa bi·sarang dingtang dingtang neng·nikanirangko chagrongna nangengani gimin adita salrangna skang, A·chik Literature Society (ALS) baksana Garo Graduates Union (GGU) aro Senior Citizens Forum-ni dilgiparang, apsan tom·e chanchirimangenba, skulrangko nambate chalaina man·na gita sorkarina ku·pattianirangko on·ataha.
Meghalaya a·doko bang·bata LP skulrangan sorkarini ning·osa ong·ani gimin aro ma·mong sorkarini ra·gatgipa SSA skulrangkoba sorkarini ning·osa chalaiengani gimin skulrango skigiparangna sorkarini gipin kamrangko on·gija skulo poraienggipa bi·sarangna nambate nirok sandina cholrangko on·china, Class I-o admission ra·na gita primary skulni bi·sarangko nambate tarisamsona Primary skulrango Pre Primary skigipako rakkichina, oikorrangko aro text book-rangko poraianio neng·nikanirangko man·engani gimin nambate skie on·na cholko on·china, SDSEO-rangko somoi gita primary skulrangona re·e nirok sandianirangko dakatchina, skigiparangni skiani aro bi·sarangni skie ra·anirangko nambate nirokchina aro skulrango skigiparang aro bi·sarang absent ong·anirangko nambate nirokchina gita ia tom·anio ALS aro gipin dolrang, sorkariko didiataha.
Primary skulrango skie ra·aniko nambatatna aro skulrango poraiani dontonganirangko champenganio dingtang dingtang dolrang, managing committee-rang aro dingtang dingtang mondolirangni dakna nanggnirangkoba ia tom·anio chanchirimangaha.
